Kështu shkruante një banderolë dje në stadiumin “King Power”, duke dhënë shpjegimin më të mirë të asaj që kishte ngjarë në më pak se një vit në Premier Ligën angleze.
Lestëri ka fituar të parin titull në historinë e vet 132-vjeçare, duke u shndërruar nga një skuadër ngahera në përpjekje për t’i shpëtuar rënies nga kategoria në një ngadhënjimtare.
Një skuadër me një buxhet modest, që u ka bërë ballë milionave të Mançesterëve, të Çelsit e Arsenalit, të Totenhemit e Liverpulit.
Një histori globale, shkruan, BBC-ja, që i ka përmbysur të gjitha parashikimet, që ka sfiduar e shpërfillur logjikën në sport.
Një festë të jashtëzakonshme ka patur dje, ndërsa Lestëri nuk harroi të luante me të njëjtin përkushtim ndaj Evertonit, në ndeshjen e parafundit të kampionatit.
Edhe pse titulli qe garantuar, kampionët e sapokurorëzuar luajtën me po aq uri sa në takimet e tjera, duke i imponuar lojën e tyre Evertonit e duke fituar 3-1. Jamie Vardy nuk harroi të lërë shenjën e tij pas kthimit nga dënimi, duke shënuar dy herë dje.
Në shpërthimin e gëzimit , “humbësi i përjetshëm”, njeriu që e kishte ruajtur për në pleqërinë e tij suksesin më të pabesueshëm në futboll, italiani Claudio Ranieri, ka arritur ta përmbajë veten që të mos shpërthejë në lot.
“Unë jam njeri i çuditshëm,” ka treguar ai. “Ka një tufë kamerash përpara meje për të parë në do qaj, dhe unë them, ‘jo sot’.”
Një tjetër italian do të mbante fjalën që kishte dhënë nëse Lestëri shpallej kampion. Andrea Bocelli do të këndonte para mijëra tifozëve. “Nessun Dorma” e kënduar prej tij qe qershia mbi tortë në stadiumin e Lestërit. /tesheshi.com/
