50 mijë bizneset që operojnë në kryeqytet duke nisur nga janari i këtij viti nuk do të shpenzojmë më shumë para dhe kohë për proçedurat tatimore. Lajmin e bëri të ditur kryebashkiaku Veliaj, gjatë mbledhjes së Këshillit Ekonomik, i cili përveç shkrtimit të afateve, qetësoi sipërmarrësit se nuk do të ketë as rritje taksash gjatë 2017-ës.
“ Ne do të shkojmë duke mos propozuar asnjë rritje taksash apo rritje tarife për biznesin dhe për familjarët. Do të shkojmë me rritje të buxhetit thjesht duke rritur bazën, duke shpresuar që menaxhimi i mirë do të na çojë në një qytet më të suksesshëm”, tha ai.
Një shembull i lehtësirave proçeduriale është që nga 30 ditë që duheshin për trajtimin e kërkesë-ankesave në aspektin juridik të bizneseve, shkurtohet në 10 ditë.
Veliaj theksoi se Tirana do të jetë një qytet i hapur për biznesin, duke ju referuar vendimit të marrë pak kohë më parë për përjashtimin nga detyrimi për pagimin e taksave vendore për 3 muajt e parë nga bizneset e reja.
Bashkia pritet që t’u japë përgjigje gjashtë kërkesave të bizneseve, siç është lehtësimi i proçedurave dhe shkurtimi i afatit për proçedurën për pajisje me vërtetim për likujdim detyrimesh. Lehtësi do të ketë edhe për proçedurën e verfikimit në terren, për trajtimin të kërkesë-ankesave në aspektin juridik të bizneseve si dhe për rimbursimin e shumës së paguar tepër në llogari bankare./tesheshi.com/
