Futbollisti i përfaqësueses së Kosovës, Bernard Berisha, ka bërë më në fund debutimin e tij me skuadrë ruse, Anzhi Makhachkala-n. Berisha ka startuar si titullar në një ndeshje eksperimentale, ndërkohë që trajneri Agalarov e kishte zëvendësuar në pushimin mes dy pjesëve. Gjatë 45 minutave sa qëndroi në lojë, Berisha u shqua me depërtimet nga krahu i majtë i sulmit, ku dhe ndihmoi në njërin nga aksionet e golit për skuadrën e Anzhi-t.
Lazio nuk humbet me Etrit Berishën në portë
Në fakt, “gardiani” i kuqezinjëve ka pësuar dy gola në udhëtim tek skuadra e Bologna-s, mirëpo në pjesën e dytë të lojës performanca e tij u përmisua, duke I ardhur në ndihmë skuadrës tjetër të Romës të marrë një pikë mjaft të vështirë në udhëtim.
Elseid Hysaj i palëkundur nga froni
Mbrojtësi i “shqiponjave” ka qenë i plotë në triumfin që skuadra e tij Napoli e regjistroi në shtëpi ndaj Sassuolos. Shkodrani pati një pjesë të parë jo të mirë, për t’i ngritur rendimentet më pas në pjesën e dytë të lojës, ku dhe loja e skuadrës napolitane ndryshoi, duke qenë më ofansive dhe më kërkuese nga krahët e mbrojtjes.
Lila, pjesë e pandashme e formacionit të Pas Janinë-s.
Mbrojtësi kavajas zhvilloi 62 minuta në disfatën ndaj AEK-ut. Lila u ndëshkua me karton të verdhë në pjesën e pare dhe nuk ishte në ditën e tij më të mirë.
Lenjani i padiskutueshëm, Cana pranon stolin.
Ermir Lenjani ka vazhduar me paraqitjet e tij të mira me skuadrën e Nante-s, derisa ka qenë pjesë e padiskutuar e formacionit të trajnerit Zakaria, në ndeshjen e zhvilluar ndaj Guingamp. Ndërkohë, kapiteni i kombëtares, Lorik Cana, ndeshjen e ka shikuar nga stoli, duke mos u paraqitur në asnjë minutë edhe në këtë përballje.
Shqiptarët e Zvicrës në kërkim të fatit
Berat Gjimshiti ka ndarë rrugët me skuadrën e Zyrih. “Kalaja” e mbrojtjes shqiptare nuk ka gjetur dot akordin me skuadrën zviceriane dhe tashmë ndodhet në kërkim të një aventure të re. Serie A, mund të jetë destinacioni i tij i rradhës, përkatësisht skuadra e Atalanta-s që është e interesuar për të.
Në kërkim të një skuadre të re është edhe “bomberi” kuqezi, Shkëlzen Gashi. Lojtari më i mirë në Zvicër nuk është aktivizuar tani e disa ndeshje me skuadrës e Basel-it dhe tashmë e ka kuptuar që aventura e tij tek kampionët zvicerian ka përfunduar. Një kalim i tij tek skuadra Young Boys është shumë i mundur, por që dhe kampionati italian shihet një pistë e mundur për Gashin. /tesheshi.com/
