LDK-ja e Isa Mustafës në konferencën e përjavshme i ka dhënë ultimatum qeverisë “Haradinaj” që ta rrëzojë veten ose paralajmëroi shpejt nisjen e mocionit të mosbesimit, pa dhënë një datë për këtë.
Avdullah Hoti, shef i grupit parlamentar të LDK-së, tha se kjo qeveri është pakicë si në Kuvend ashtu edhe në secilin prej Komisioneve parlamentare, andaj e sheh të rënë.
“Ne kemi ofruar opsionin tonë për një tryezë të përbashkët të partive politike për të dakorduar një datë të zgjedhjeve dhe vendimet që duhet të ndodhin në ndërkohë. Sepse është me rëndësi që zgjedhjet të mos mbahen me nguti brena 30 ditëve. Nëse kjo nuk ndodhë ne jemi të obliguar që ta çojmë përpara mocionin e votëbesimit për qeverinë”, tha Hoti.
Ai tutje tha se partitë duhet ta marrin seriozisht kërkesën e LDK-së për zgjedhje.
Hoti foli edhe për deportimin e shtetasve turq, ku kritikoi kryeministrin Ramush Haradinaj për mungesën në seancën e jashtëzakonshme, kurse për presidentin Hashim Thaçi tha se ka tejkaluar kompetencat ligjore. /tesheshi.com/
