Nga Blendi Gashi
Kryetari i Lidhjes Demokratike të Kosovës, Isa Mustafa, njëherit kryeministër i vendit nuk ndalet së ‘kërcënuari’, deputetët e partisë së tij të cilët nuk mendojnë njëjtë si ai.
Kryesia e LDK-së në mbledhjen e fundit që mbajti të mërkurën, takim të cilin e udhëheqi pikërisht Mustafa, me temë kryesore çështjen e Demarkacionit me Malin e Zi, më pas ka dalë me një deklaratë plotë vrerë, ndaj disa deputetëve dhe anëtarëve që kanë mendim ndryshe nga krerët e partisë, duke treguar kështu se ky sujekt çdo ditë e më shumë po e humb identitetin e vet, demokracinë e brendshme që mund të thuhet ishte virtyt, derisa drejtohej nga presidenti i ndjerë Ibrahim Rugova.
Kjo parti pas mbledhjes së kryesisë doli me një deklaratë që as vet nuk e beson, duke thënë se janë krejtësisht unik në mbështetjen e ratifikimit të vijës kufitare me Malin e Zi, ndërsa në media kosovare u raportua se pikërisht me kërkesë të LDK-së Demarkacioni u shty për 1 shtator në Kuvend, pasi kjo parti nuk është e sigurt se ka numrin e votave të shumicës së deputetëve të saj.
LDK “godet” deputetin e vet
LDK përmes deklaratës së bërë “godet” më së shumti deputetin, Shpejtim Bulliqi, i cili haptazi ka shprehur mospajtimin me Isa Mustafën për Demarkacionin, por edhe deputetët Arben Gashi, Vjosa Osmani e Adem Salihaj që besohet se nuk do të japin votën pro.
“Zërat që po dëgjohen në opinionin publik, që prezantohen si deputetë apo anëtarë të LDK-së, të cilët i gëzohen dhe trumbetojnë kundër votimit në Kuvend, duhet të tregojnë se cilit koalicion i përkasin.
Ata nuk mund të flasin për koalicionin qeverisës, sepse qëndrimet për LDK-në i prezantojnë organet udhëheqëse dhe statutare të saj, kurse është çështje e vullnetit të tyre ndoshta edhe e ndonjë interesi që të bëhen zëdhënës të AAK-së në njërën anë dhe mbështetës të atyre që po përdorin gazin lotsjellës dhe dhunën kundër institucioneve, në anën tjetër.
Të tillët, që u bashkohen atyre që shpallin tradhtar çdo ditë, që kërcënojnë dhe shantazhojnë shtetin, mund të kenë agjenda individuale por nuk prezantojnë politikat dhe qëndrimet e Lidhjes Demokratike të Kosovës”, thuhet në deklaratën e LDK-së që e tëra siç duket është shkruar për deputetin e tyre kundërshtues Shpejtim Bulliqi edhe pse nuk ia përmendin emrin.
Bulliqi: deklarata e partisë, linçuese; jam dhe do mbetem anëtar i LDK-së
Deklarata e lëshuar nga kryesia e LDK-së asapk nuk i ka pëlqyer deputetin Bulliqi, i cili ka reaguar përmes një postimi që ka bërë në profilin e tij në Facebook, duke thënë se me këto deklarata linçuese të tillët po sjellin një kulturë të rrezikshme e cila nuk pranohet nga asnjë vend i botës demokratike.
“Ju themi se e kanë gabim sepse unë kam qenë jam dhe do mbetëm një anëtar i LDK-së i rrugës Rugoviane, ku interes mbi të gjitha do të jetë shtet-ndërtimi, qytetarët dhe ruajtja e integritetit territorial të Kosovës duke kultivuar edhe raporte të shëndosha me miqtë tanë ndërkombëtar. Unë vetëm jam duke e përkrahur idenë dhe vizionin Rugovian, jam duke kontribuar në tentativën që Kosova të mos humb territor në tavolinë, jam duke u angazhuar që Kosova në raport me Malin e Zi të ketë kufirin që e potenconte edhe presidenti ynë Rugova(çakorr dhe Kulle e Zhlepit), krejt ketë duke u mbështetur në fakte shkencore dhe profesionale”, ka shkruar Bulliqi.
Më tej deputeti i LDK-së ka shkruar se ata që e përkrahin totalitarizmin brenda LDK-së janë vetëm një grup i interesit të cilët nuk do të munden që asnjëherë ta vejnë në pikëpyetje anëtarësinë, kontributin dhe lojalitetin tim politik ndaj LDK-së.
“Me këto deklarata linçuese të tillët po sjellin një kulturë të rrezikshme e cila nuk pranohet nga asnjë vend i botës demokratike. Po mundohen të na paraqesin si dorë e zgjatur e ndokujt brenda LDK-së, apo edhe jashtë saj. Ju themi se e kanë gabim sepse unë kam qenë jam dhe do mbetëm një anëtar i LDK-së i rrugës Rugoviane, ku interes mbi të gjitha do të jetë shtet-ndërtimi, qytetarët dhe ruajtja e integritetit territorial të Kosovës duke kultivuar edhe raporte të shëndosha me miqtë tanë ndërkombëtar. Tashmë një grupim brenda LDK-së të cilët në tentative që të ripozicionohën sa më mire brenda LDK-së, janë duke i prire një fushate kundër meje si anëtar i LDK-së dhe si deputet i Kuvendit të Kosovës, fushatë me akuza të cilat janë të pa pranueshme në përpjekje për të hequr dorë nga parimet shkencore dhe profesionale”, i kundërpërgjigjet Bulliqi, partisë së tij. /tesheshi.com/
