“Moska do të respektonte çfarëdo vendimi të marrë nga Suedia për t’iu bashkangjitur NATO-s, por do të ndërmerrte ‘masa’ për t’iu përgjigjur afrimit të aleancës ushtarake drejt kufijve të saj,” ka paralajmëruar Ministri rus i Punëve të Jashtme, Sergei Lavrov.
“Në rast se Suedia vendos që t’i bashkangjitet NATO-s, nuk do të na shkojë mendja se Suedia ka vendosur të na sulmojë. Këtë mund t’ua them tashmë. Sidoqoftë, pasi infrastruktura ushtarake e Suedisë në atë situatë do t’i raportonte komandës supreme të NATO-s, sigurisht që ne do të na duhej të ndërmerrnim masa ushtarako-teknike në kufijtë veriorë, duke patur parasysh që prapa atij kufiri gjendet një bllok ushtarako-politik i cili e sheh Rusinë si një kërcënim dhe do të dëshirojë t’i frenojë aktivitetet tona në çfarëdo mënyre të mundshme,” deklaroi ministri rus për gazetën ditore suedeze Dagens Nyheter.
Ai nuk saktësoi se për çfarë masash konkrete është fjala.
“Rusia nuk është e interesuar për nxitjen e kurrfarë konflikti ushtarak në Evropë,” tha Lavrov, duke folur për aktivitetet ushtarake në Evropë, para se gjithash në kontekst të marrëdhënieve të Rusisë me NATO-n dhe të statusit neutral të Suedisë.
Ai shtoi se Rusia ka një varg marrëveshjesh me paktin, siç ka dhe “projekte ushtarake bilaterale” me fqinjët veriorë, përfshirë këtu dhe Suedinë.
“Në këtë punë gjithmonë jemi nisur nga pesha e besimit dhe transparencës,” ka përfunduar Lavrov. /tesheshi.com/
