As temperatura e ujit e as përdorimi i sapunëve antibakterialë nuk kanë kurrëfarë efekti në sasinë e bakterieve që largohen kur pastrojmë duart. Dallimi në numrin e baktereve është treguar në fakt në mënyrën se si lahen duart.
Në mënyrë që njeriu të largojë sa më shumë bakterie, është e nevojshme që të fërkojë duart me sapun për të paktën 10 sekonda, sipas një studimi të kryer në New Jersey.
“Njerëzit duhet të ndjehen të rehatshëm si gjatë larjes ashtu edhe pas larjes së duarve, por sa i përket efektit të larjes – është e njëjta gjë si kur i lajmë ato në ujë të ftohtë apo të ngrohtë. Ky hulumtim mund të ketë një ndikim të madh në të ardhmen e hidrocentraleve, pasi përdorimi i ujit të ftohtë kursen më shumë energji të nevojshme për të ngrohur ujin”, thotë udhëheqësi i studimit profesori Donald Schaffner nga Rutgers University.
Në studim kanë marrë pjesë 21 vullnetarë të cilët i kanë ekspozuar duart ndaj bakterieve të parrezikshme dhe të cilët kanë larë duart e tyre në temperatura të ndryshme gjatë periudhës gjashtë mujore.
Duart i kanë larë për 10 sekonda në ujin me temperaturë 15.5, 26 dhe 38°C, duke përdorur sasi të ndryshme të sapunit. Është gjetur se as temperatura e ujit e as sasia e sapunit që ata kanë përdorur nuk ndikojnë në sasinë e baktereve që kanë larë nga duart e tyre.
Hulumtuesit janë dakord se është më e rëndësishme që punëdhënësit, sidomos në industrinë e hotelerisë, të sigurojnë që stafi të lajë duart në mënyrën e duhur, sesa në cilën temperaturë duhet të lahen ato. /tesheshi.com/
