Largimi nga jeta e i ish- kryeministrit të Kosovës Bajram Rexhepi është përcjellë me hidhërim dhe në Tiranë.
Zyrtarët e shtetit dhe liderët e politikës i kanë dhënë lamtumirën mikut dhe kolegut nga Kosova me fjalë të ndjera.
Ja si e formuluan lamtumirën e tyre për Rexhepin presidenti Ilir Meta, kryeministri Edi Rama, kreu i opozitës Lulzim Basha, e të tjerë politikanë.
Njoftimi i Presidencës:
“Presidenti i Republikës, Sh.T.Z. Ilir Meta i shpreh ngushëllimet e sinqerta familjes, të dashurve e miqve të ish-Kryeministrit të Kosovës, Bajram Rexhepi për këtë humbje të madhe.
Kreu i Shtetit thekson se veçanërisht kontributi i tij si Kryeministër i parë i Kosovës, si politikan i spikatur në vitet e para të Kosovës së çliruar, si luftëtar i paepur për çështjen e Pavarësisë së Kosovës dhe përpjekjet e tij për ndërtimin e instucioneve të saj, do të mbeten të paharruara në mendjen dhe zemrat e të gjithë shqiptarëve. I përjetshëm qoftë kujtimi i tij!”
Kryeministri Edi Rama:
“Bajram Rexhepi ishte një shqiptar i ndershëm dhe patriot. Një burrë i thjeshtë që i bëri nder Kosovës në çdo detyrë dhe i bën sot të ndjehen të ligështuar për humbjen e tij, jo vetëm miqtë po edhe të gjithë ata që politikisht ishin në llogore të tjera nga e tija. Ai i’a doli aty ku shumëkush nuk i’a del dot: La pas një kujtim të mirë tek të mëdhenjtë e tek të vegjëlit.Lamtumirë mik i mirë!”
Kreu i PD-së Lulzim Basha:
“Bajram Rexhepi ishte njeri i veçantë dhe shqiptar i madh. Pak njerëz i kanë shërbyer popullit të tyre si ai, duke u kujdesur me përkushtim si mjek për jetët e njerëzve, duke luftuar për lirinë e tyre dhe duke drejtuar përpjekjet e tyre për demokraci dhe përparim.
Kam patur nderin të takohem shpeshherë me Bajramin dhe do të ruaj përherë brenda meje mbresat e pashlyera për dinjitetin, përunjësinë dhe mirësinë e tij.
Në këto momente të dhimbshme të ndarjes së tij të parakohshme nga jeta bashkoj lutjet e mia me ato të familjarëve dhe miqve të tij. U prehtë në paqe! I paharruar kujtimi i tij!.
Ish-kryeministri Pandeli Majko:
“Bajram Rexhepi ndroi jetë duke lënë pas kujtimin e mikut.
Ish kryeministri i Kosovës ishte një doktor i jetës dhe kordinatë njerëzore për ata që e njihnin.
Ngushëllime familjes dhe të afërmve të tij.”
Ish-kryeministri Sali Berisha:
“Ish kryeministri i Kosoves, Bajram Rexhepi u nda sot nga jeta!
Te dashur miq, familja Rexhepi, Kosova dhe mbare kombi humben sot nje burre te shquar, nje luftetar guximtar te lirise, nje shtetar te zotin, ish kryeministrin e Republikes se Kosoves, Bajram Rexhepi.
Me kete rast le t’iu shprehim ne ngushellimet me te sinqerta familjes se ish kryeministrit te ndjere Rexhepi, autoriteteve te Kosoves dhe te lutemi se bashku qe shpirti i tij i mire te prehet ne paqe! Sb”/tesheshi.com/
