“Lamtumira” e Kosovës me dinarin, ashpërsohet reagimi amerikan

SHBA ashpërsoi dhe më tej gjuhën ndaj Kosovës, më saktë qeverisë në Prishtinë, në lidhje me heqjen nga qarkullimi të dinarit, me të cilin vepronin komunitetet serbe në Kosovë, për ta lënë euron si monedhe të vetme të çdo veprimi financiar.

Një deklaratë e fundit e ambasadorit amerikan në Kosovë, Jeffrey Hovenier, thotë këto veprime kufizojnë opsionet që SHBA të shërbejë si avokuese efektive për Kosovën në arenën ndërkombëtare.

“Qeveria e Shteteve të Bashkuara të Amerikës është thellësisht e shqetësuar për veprimet e fundit të autoriteteve të Qeverisë së Kosovës që kanë ndikim direkt dhe negativ në pjesëtarët e etnisë serbe dhe minoritetet tjera në Kosovë. Këto veprime janë duke rritur në mënyrë të panevojshme tensionet ndëretnike dhe si pasojë kufizojnë opsionet që Shtetet e Bashkuara të shërbejnë si avokuese efektive për Kosovën në arenën ndërkombëtare. Ato përfshijnë operacionet nga Policia e Kosovës, me urdhër të Ministrisë së Punëve të Brendshme, gjatë javës së kaluar në zyrat e institucionet e administruara nga Serbia në Dragash, Pejë, Istog, Klinë dhe në OJQ-së Qendra për Paqe dhe Tolerancë në Prishtinë.

Ne jemi të shqetësuar edhe nga aksionet e Policisë së Kosovës sot për të sekuestruar dinarë serb dhe automjetin transportues që distribuonte pagesat e përfitimeve sociale nga Serbia. Ne kërkojmë nga autoritetet e Kosovës që të sigurojnë që individët për të cilët janë destinuar këto pagesa të përfitimeve sociale t’i marrin ato pa vonesë”, thuhet ndër të tjera në deklaratën e ambasadorit të SHBA.

Deri më tani, qeveria kosovare kë zgjedhur të mos komentojë reagimet ndërkombëtare, port ë sqarojë opionionin mbi qëllimin e mirë të lëvizjes së Bankës Qendrore të Kosovës, duke potencuar faktin se vendimi mbështetet në Kushtetutë. /tesheshi.com/