Çdo vit, vetëm në Mbretërinë e Bashkuar janë mbi 50 mijë femra, të cilat diagnostikohen me tumor në gji. Janë shifra me të vërtetë shqetësuese, por duket se shkenca është duke bërë një hap të madh në këtë drejtim, sa i takon kurimit të tyre.
Një studim i fundit në lidhje me kancerin e gjirit, i zhvilluar në Universitetin e Seffield, u ka ofruar shkencëtarëve zgjidhje të pabesueshme. Rreth 85% e qelizave tumorale të përfshira në sëmundje kanë rrënjët e tyre në kocka dhe mund të shkatërrohen falë një ilaçi që ka aftësinë të penetrojë në thellësi dhe brendësi të kockës, duke ndaluar rritjen e tumorit.
bëhet fjalë për ilaçe që tashmë janë në përdorim, si ato me bazë bifosfonati, substanca që përdoren në trajtimin e osteoporozës.
“Bëhet fjalë për rezultate të pabesueshme. Pacientët ER negativë (një lloj kanceri i gjirit në të cilin qelizat tumorale rezultojnë negative nga testi i receptorëve të estrogjenit) janë ato me prognozën më të ulët. Mbi këta pacientë duhet të përqendrojmë kërkimet, të identifikojmë dhe të provojnë trajtimin”,- ka shpjeguar mjekja Alison Gartland nga ekipi i mjekëve universitarë.
“Bëhet fjalë për progrese shumë të rëndësishme në betejën kundër metastazave të kancerit në gji, përveç se rrisin mundësitë e mbijetesës së mijëra pacientëve”,- ka shtuar ajo.
Femrat, të cilat diagnostikohen me tumor të tipit ER negativ bëjnë 30% të pacientëve në tërësi, prognoza e së cilëve mund të përmirësohet falë këtij kërkimi shkencor. Bëhet fjalë për një tumor që prodhon një enzimë të quajtur LOX, i cili sulmon kockën dhe u jep përparësi qelizave kanceroze. /tesheshi.com/
