Tre vite pasi u tërhoq nga aktiviteti ndërkombëtar me përfaqësuesen gjermane, Philipp Lahm lajmëron për lënien e futbollit në fund të sezonit.
Me mbi 500 ndeshje të luajtura me Bajernin, kapiteni 33-vjeçar i bavarezëve e ka njoftuar vendimin pas fitores të së martës ndaj Volfsburgut.
“Do të ndaloj së luajturi futboll në fund të sezonit,” pohoi Lahm në faqen zyrtare të Bajernit.
Fituesi i shtatë titujve kampion në Bundesligë me Bajernin e Mynihut, dhe në kërkim të një trofeu të tetë, Lahm ka treguar se tërheqja ka qenë në mendjen e tij prej kohësh.
“Unë mund të vazhdoj me stilin tim të udhëheqjes, duke dhënë më të mirën time çdo ditë, në çdo stërvitje, gjer në fund të sezonit. Mund të vazhdoj të bëjn kështu këtë sezon, por jo më tej.”
Veç faktit se do t’i japë fund karrierës si futbollist një vit para mbarimit të kontratës me Bajernin, ai ka refuzuar dhe një detyrë në klub pas tërheqjes.
“Ka patur bisedime, dhe në fund vendosa se nuk është koha e duhur për të marrë një pozicion të ri te Bajerni.”
Philipp Lahm është fituesi i Kupës së Botës me Gjermaninë, i Ligës së Kampionëve, i Kupës së Botës për Klube, veç trofeve të tjerë në futbollin gjerman. /tesheshi.com/
