Seanca e sotshme gjyqësore mbi të akuzuarit nga konflikti i armatosur në “Lagjen e Trimave” Kumanovë u zhvillua në një atmosferë mjaft tensionuese. Të gjithë pjesëmarrësit e grupit të Kumanovës sot në seancë u revoltuan nga deklaratat e bashkëluftarit të tyre Sevdail Miftarit, i cili doli në mbrojtje të Ali Ahmetit dhe BDI-së pasi sipas tij, Ahmeti ka dashur vetëm t’i ndihmojë grupit e jo ta fusë në kurth. Me këtë Miftari ndryshoi edhe deklaratën e tij paraprake në të cilën akuzonte shërbimin sekret dhe një agjent shqiptar për kurth. Ndërsa sot ai nuk përmendi asnjë emër dhe refuzonte të pranojë nëse e njeh inspektorin me emrin Armend dhe tre persona të tjerë që kanë hapur korridorin për largimin e anëtarëve të grupit në Maqedoni.
“Një person që dëshiron të tradhtojë nuk ta hap telefonin(dedikuar Ali Ahmetit). Unë nuk e kam dashur kurrë BDI-në dhe as nuk kam votuar për to pasi kam 7 anëtarë të familjes që kanë qenë në UÇK dhe asnjëri nuk është i punësuar, por Ali Ahmeti nuk ka dashur të na tradhëtojë”, deklaroi para gjykatës i akuzuari Sevdail Miftari.
Avokatët, por edhe të akuzuarit e pyesnin me ngulm Miftarin nëse dikush e ka kërcënuar dhe prandaj tani ka dalë në mbrojtje të Ahmetit, por ai ishte decid se ky është mendimi i tij personal.
“A je i sigurt se Ali Ahmeti nuk na ka tradhëtuar?”, pyeti i akuzuari Nasur Beqiri.
“Po”, u përgjigj i akuzuari Sevdail Miftari.
“Ty të ka mësuar dikush ta mbrosh atë kriminel. Turp të qoftë!”, iu kundërpërgjigj Nasur Beqiri.
Ndërsa sipas avokatit të Sevdail Miftarit, Naser Raufi është e pakuptimtë, se si klienti i tij e ndryshoi deklaratën e tij paraprake, duke refuzuar të përmend emra zyrtarësh të implikuar në rast, edhe pse në seancën e mëparshme ai nuk hezitonte të fliste edhe për funksionarë politikë.
“Nuk tha që ka involvim të ndonjë strukture ose partisë politike shqiptare, posaçërisht jo të BDI-së. Këtu kishte reagime nga të akuzuarit duke menduar se ky fsheh ndonjë emër…Tani u tërhoq por unë jam i sigurt se nuk ka kërcënime në bazë të bisedës që e kemi bërë. Fillimisht përmendi disa emra ndërsa tani reteroi, por unë vërtetë nuk e di arsyen e kësaj tërheqje, më duket e pakuptimtë..”, tha avokati Naser Raufi.
Ndërkohë që Miftari pohonte para gjykatësit, vazhdimisht nga bankat e të akuzuarve dëgjoheshin britma të tipit – gënjën, gënjeshtër dhe të shara.
Kujtojmë se vitin e kaluar në “Lagjen e Trimave” në Kumanovë, një grup i armatosur i përbërë nga ish ushtarë të UÇK-së, është përleshur me forcat e sigurisë të Maqedonisë. Nga rasti në fjalë, u vranë 8 policë nga njësitet speciale dhe nga njësitet e veçanta të MPB-së, ndërkaq 4 të tjerë u plagosën. Nga ana tjetër humbën jetën edhe 10 pjesëtarë të grupit të armatosur. Mensur Krasniqi – /tesheshi.com/
