Derbi i kryeqytetit italian është fituar 1-3 nga Lacio, që ka marrë hak për atë humbje të fazës së parë.
Ndaj një Rome çuditërisht me probleme sot, që pak shfaqi nga potenciali i saj i zakonshëm, Lacio arriti të godiste në momentet e duhura.
Thomas Strakosha, portieri i përfaqësueses së Shqipërisë, ka qenë vendimtar me pritjet e tij, veçanërisht në fillim të dy pjesëve, kur dhe Roma ka ushtruar presion dhe ka krijuar një numër rastesh. Më së paku në katër raste ai bëri ndërhyrje përcaktuese, duke shmangur gola thuajse të sigurt.
Keita ka qenë shënuesi i dy golave për Lacion, një në minutën e 12-të dhe një tjetër në të 85-tën. Basta do të shënonte gjithashtu pesë minuta pas nisjes së pjesës së dytë.
I vetmi gol i Romës është shënuar pas një 11-metërshi krejtësisht të paqenë, madje qesharak. De Rossi ka gjuajtur nga pika e penalltisë, duke sjellë një barazim të përkohshëm.
Pasi e eliminoi në gjysmëfinalen e Kupës së Italisë, vjen kështu dhe kjo fitore e Lacios ndaj Romës.
Roma mbetet gjithsesi në vend të dytë në Serinë A; Lacio forcon pozitat në vend të katërt, duke e fituar përkohësisht betejën me Atalantën për këtë pozicion. /tesheshi.com/
