Ministri i Jashtëm italian Antonio Tajani u zgjodh të shtunën si kreu i partisë konservatore Forza Italia të themeluar 29 vjet më parë nga manjati i medias Silvio Berlusconi, i cili vdiq në qershor.
Tajani, i cili u zgjodh unanimisht nga këshilli kombëtar i partisë, përballet me detyrën e vështirë për të ringjallur pushtetin e një partie, mbështetja publike e së cilës ka qenë në rënie prej vitesh, madje edhe para vdekjes së Berlusconit.
Tajani e kaloi pjesën më të madhe të karrierës jashtë Italisë, ai ishte Komisioner Evropian në Bruksel dhe President i Parlamentit Evropian. Atij i mungon karizma e paraardhësit të tij dhe nuk është ndër politikanët më të njohur italianë, shkruan Reuters.
“Unë po marr një trashëgimi pothuajse të pamundur,” tha Tajani, 69 vjeç, në një mbledhje të përfaqësuesve kombëtarë, evropianë dhe lokalë të partisë Forza Italia në Romë.
“Nuk është e lehtë të drejtosh një lëvizje politike të udhëhequr nga Silvio Berlusconi për gati 30 vjet,” tha Tajani në skenë përpara një fotoje të madhe të Berlusconit.
Partner në qeverinë e djathtë
Forza Italia është partneri i vogël midis tre partive kryesore në qeverinë e djathtë të kryeministres Giorgia Meloni, së bashku me Fratelli di Italia të saj dhe Lega-n e Matteo Salvinit.
“Ne duam të jemi qendra e qendrës së djathtë,” tha Tajani, ministër i Jashtëm që nga tetori i kaluar.
“Ne jemi të ndryshëm nga aleatët tanë dhe nuk kemi ndërmend të heqim dorë nga identiteti ynë”, shtoi ai.
Sondazhet e fundit tregojnë se partia e tij mbështetet nga rreth shtatë për qind e votuesve, Lega me rreth dhjetë për qind dhe Fratelli nga pothuajse 30 për qind.
Pasi filloi aktivitetin e tij politik në një lëvizje të vogël monarkiste në vitet 1980, Tajani iu bashkua Forza Italia-s e themeluar në 1994 dhe ishte zëdhënësi i Berlusconit në qeverinë e tij të parë në të njëjtin vit. /tesheshi.com/
