Presidenti turk Erdogan tha të shtunën në Stamboll se nuk do të lejojë që 15 korriku të harrohet, as pas shtatë vjetësh, as në 70 vjet.
Erdogan iu drejtua qytetarëve të mbledhur në Stamboll në një program të organizuar për të shënuar përvjetorin e shtatë të tentativës së dështuar të grushtit të shtetit në vitin 2016, kur anëtarët e organizatës FETO depërtuan në institucionet shtetërore dhe u përpoqën të rrëzonin qeverinë e zgjedhur në mënyrë demokratike.
Gjatë fjalimit të tij, Erdogan foli për rëndësinë që të mos harrohet ajo që ndodhi natën e 15 korrikut.
“Në përvjetorin e shtatë të 15 korrikut, unë deklaroj se nuk do të lejojmë që 15 korriku të harrohet, as në shtatë, as në 70 vjet”, tha Erdogan.
Duke folur për rëndësinë e kujtesës, Erdogan kujtoi fjalët e ish-liderit boshnjak, të ndjerit Alija Izetbegoviç, i cili tha se “gjenocidi i harruar po përsëritet”.
“Ne duhet të kujtojmë se, ashtu si gjenocidi i harruar, tradhtia e harruar do të na godasë pas shpine në një mënyrë shumë më tinëzare,” tha Erdogan, duke vënë në dukje se kjo është një nga arsyet pse 15 korriku u shpall Dita e Demokracisë dhe Unitetit Kombëtar.
“Nëse harrojmë, Zoti na ruajt, do t’i hapim rrugën fatkeqësive të ngjashme,” tha Erdogan, duke shtuar:
“Ashtu siç i njohëm tradhtarët e FETO-s, edhe ndihmuesit e tyre i shënuam në kujtesën tonë të përhershme; kush nuk është në gjendje të kuptojë 15 korrikun, ai nuk mund ta kuptojë qëndrimin fisnik të këtij populli që kundërshtoi hajdutët, çakejtë dhe juntën.
Gjatë fjalimit, Erdogan tha gjithashtu se zemërimi ndaj atyre që derdhën gjakun e fëmijëve turq duhet të mbahet gjallë. Ai ndër të tjera tha se 15 korriku ishte rezistenca e atyre që vdiqën për atdheun dhe popullin e tyre dhe atyre që në pranverën e jetës së tyre ranë para tankeve, armëve dhe plumbave.
Gjatë tentativës për grusht shteti në Turqi, 253 persona vdiqën dhe më shumë se 2730 u plagosën. /tesheshi.com/
