Nga sot, kosovarët mund të shkojnë lirisht në BE, pa viza, pasi ky 1 janar shënon heqjen e një barriere për Kosovën, e cila morri trajtën e një sagë politike me në thelb padrejtësinë europiane ndaj saj.
Kryeministri Rama, njeriu që u investua fuqishëm dhe me kritika të ashpra ndaj BE-së mbi mosliberalizimin e vizave për Kosovën, duke e trajtuar dhe si një pabesi të saj, shkroi në rrjete pa shumë komente:
“Ky vit nis i mbarë për Kosovën, me lirinë e shumëpritur të lëvizjes në Bashkimin Europian”.
Ndërsa kryeministri Kurti, nga aeroporti “Adem Jashari” përcolli këtë mesazh:.
“Kemi pritur shumë gjatë, nga sot po hiqet një padrejtësi. Qytetarët tanë tashmë do të mund të lëvizin në 32 vende. Sot do të udhëtojnë për në Vjenë 50 qytetarë të cilët kanë fituar këtë mundësi në kuadër të fushatës tonë. Të respektojnë kriteret, dhe kudo që të udhëtojmë mos të harrojmë se shtëpia jonë është Kosova. Urime viti i ri dhe për herë të fundit urime liberalizimi i vizave”.
Kujtojmë se liberalizimi i vizave me Kosovën pritej që pas kalimit në parlament të Demarkacionit, nën qeverisjen “Haradinaj”, por që nuk ndodhi, pasi u shtuan të tjera kritere, duke e konsideruar si një besëprerje europiane. /tesheshi.com/
