Kuvendi i Maqedonisë ka refuzuar kërkesën e opozitës për hapjen e procedurës së shkarkimit të presidentit Gjorge Ivanov.
Pas debatit një javor, mbrëmë ligjvënësit dështuan t’i arrijnë votat e nevojshme për ta mbështetur procedurën në Gjykatën Kushtetuese të Maqedonisë.
Socialdemokratët opozitarë patën kërkuar shkarkim pas vendimit kundërthënës të zotit Ivanov, për amnistinë e dhjetëra zyrtarëve të lartë të akuzuar për korrupsion. Kjo amnisti ka shkaktuar protesta në rrugë dhe kritika të ashpra nga komuniteti ndërkombëtar.
Më vonë amnistia është tërhequr.
Kërkesa në Kuvendin e Maqedonisë ishte mbështetur, po ashtu, edhe nga partneri në koalicionin qeveritar, partia shqiptare, Bashkimi Demokratik për Integrim, mirëpo sërish nuk u arrit 2/3 e votave të nevojshme për shkarkim të presidentit Ivanov. /tesheshi.com/
