Kuvendi ka miratuar në një seancë maratonë ngritjen e komisionit ad-hoc për reformën zgjedhore. Pro ngritjes së komisionit votuan 116 deputetë. Ky komision do të drejtohet nga dy bashkëkryatërë, Oerd Bylykbashi (PD) dhe Bled Çuçi (PS).
Ndërkohë me 117 vota pro dhe 1 kundër është miratuar projektligji për pakicat kombëtare i cili u diskutua pas shtyrjes së seancës së djeshme.
Drafti parashikon njohjen e pakicës bullgare si minoritet, të cilët do kenë të njëjtat të drejta si 8 pakicat e tjera kombëtare si ajo greke, maqedonase, vllahe/arumune, rome, egjiptiane, malazeze, boshnjake, serbe.
Seanca e ditës së sotme nisi rreth orës 08:30, pas shtyrjes së djeshme të punimeve të Kuvendit, ndërsa debatet nga opozita u përqëndruan në lidhjet e krimit me politikën dhe manipulimin e zgjedhjeve të 25 qershorit.
Seanca regjistroi disa replika të njëpasnjëshme të kryeministrit Edi Rama me kreun e PD-së, Lulzim Basha, akuza të ndërsjellëta, por edhe batuta që dukej se çtensiononin deri diku sallën e Kuvendit.
Gjatë pasdites, asnjë prej përfaqësuesve të qeverisë nuk ishte i pranishëm në seancë për shkak të mbledhjes së qeverisë që u zhvillua në qytetin e Vlorës, sipas një axhende të përcaktuar më parë.
