Nga Mensur Krasniqi
Prej dy ditësh vazhdon debatin në Kuvendin maqedonas për zgjedhjen e kryetarit, zëvendëskryetarit; si anëtarëve dhe zëvendësve të tyre të komisionit për çështje të zgjedhjeve dhe emërimeve.
Në koordinimin e deritanishëm që u zhvillua këtë të mërkurë, përfaqësues të partive parlamentare dhe kryesuesi i seancës plenare, Trajko Veljanoski kanë hapur çështjen e përshpejtimit të procedurës për mbylljen e pikave të seancës konstituive, megjithatë deputetët që kanë qenë pjesë e koordinimit njoftojnë se nuk është arritur marrëveshje.
Deputetët nuk janë dakorduar për shkurtimin e minutazhit të replikave dhe fjalimeve procedurale dhe as për reduktim të listës së të paraqiturve për fjalime në Kuvend.
Seanca do të vazhdojë sipas rregullores deri në kalimin e të gjithë fjalimeve nga deputetët e paraqitur për të marrë fjalën. Janë mbi 50 të paraqitur kurse për dy ditët e kaluara janë mbyllur vetëm 2 prej tyre.
Kujtojmë se deputetët e VMRO-DPMNE-së janë ata të cilët po bëjnë përpjekje që me çdo kusht të zvarrisin procesin e zgjedhjes së kryetarit të Kuvendit, meqë secili prej tyre replikon kolegun e tij bashkëpartiak.
Nga ana tjetër. LSDM-ja e Zoran Zaevit ka vazhduar që të akuzojë Nikolla Gruevskin dhe partinë e tij për situatën e krijuar në vend, për të cilën thonë se janë duke u dëmtuar vetëm qytetarët.
”Prindërit janë të shqetësuar për stresin që kalojnë fëmijët e tyre si nxënës, përderisa VMRO-DPMNE e bllokon Kuvendin ku ne duhet të ndalojmë testimin ekstern. Qytetarët shqetësohen përderisa VMRO-DPMNE e bllokon Kuvendin ku ne duhet të ndalojmë taksën radiodifuzive. Punëtorët shqetësohen përderisa VMRO-DPMNE e bllokon Kuvendin ku ne duhet të rrisim pagat e tyre. Qytetarët shqetësohen përderisa VMRO-DPMNE e bllokon Kuvendin ku ne duhet të sjellim planin për jetë që e premtuam para zgjedhjeve”, thuhet në reagimin e LSDM-së.
Interesant ka qenë edhe komenti i deputetit të BDI-së, Artan Grubi në emisionin e djeshëm të Click Plus në Tv21 ku duke folur për aktivitetet e fundit në Maqedoni, kur tha se VMRO-ja është e gatshme të qëndrojë 4 vjet në këtë tempo për të bllokuar kuvendin dhe formimin e qeverisë.
Dhe e gjithë kjo zvarritje që bën VMRO në kuvend sipas Grubit është në bazë të rregullores së Kuvendit.
Ndërsa sipas deputetit të Lëvizjes BESA, Zeqirija Ibrahimi, zgjidhja e krizës politike, gjegjësisht e kryetarit të Kuvendit nuk qëndron në seancat plenar të Kuvendit, por në një marrëveshje eventuale ndërmjet partive politike.
“Teoretikisht VMRO-DPME mund ta bllokojë Kuvendin me muaj. Prandaj unë mendoj se zgjidhja tashmë nuk është në seancat plenare të Kuvendit, por në marrëveshje ndërmjet liderëve politikë për daljen e vendit nga kriza. Prandaj, nëse nuk ulen kryetarët e partive parlamentare për të kërkuar zgjidhje të krizës, jam i sigurt se kjo është mënyra më e mirë për vazhdimin e krizës”, deklaroi për tesheshi deputeti i BESËS, Zeqirija Ibrahimi. /tesheshi.com/
