Nga Blendi Gashi
Çështja e situatës në veri të Mitrovicës, me kërkesë të Vetëvendosje-s është shtruar për diskutim në Kuvendin e Kosovës, pas ngjarjeve me “trenin” dhe “murin”.
Ndërsa opozita kosovare shprehu brengën e saj se dora e shtetit nuk shtrihet në veri, për çka kërkoi ndërprerjen e dialogut, mazhoranca e mohoi një gjë të tillë duke thënë se falë bisedimeve në Bruksel gjendja në këtë pjesë ka ndryshuar rrënjësisht, ndonëse pranoi ekzistimin e strukturave ilegale.
Deputeti i Vetëvendosje-s, Rexhep Selimi, njëherit inicues i interpelancës me kryeministrin, tha se treni dhe tensionet e herëpashershme në këtë pjesë janë inskenim i qeverive të Serbisë dhe Kosovës.
“Në veri nuk ka shtet, nuk ka polici, pasi ajo më shumë i përgjigjet Serbisë se sa Kosovës”, tha Selimi.
Por Selimit iu kundërpërgjigj menjëherë kryeministri Mustafa që tha se veriu është pjesë e Republikës dhe se gjendja në këtë pjesë duhet trajtuar pa ngarkesa pasi fjala është për territor të shtetit; ndërsa pranoi se ekzistojnë strukturat ilegale.
“Kosova përballet me dy probleme që e ngarkojnë situatën: strukturat paralele në shumë komuna, jo vetëm me shumicë serbe, por edhe në komunat e banuara me shqiptarë”, tha ai.
Mustafa theksoi se nuk ka alternativë tjetër pos dialogut për t’i zgjidhur të gjitha problemet që Kosova ka që nga përfundimi i luftës.
“Si kryeministër konsideroj se nuk ka alternativë tjetër pos dialogut”, tha Mustafa akuzoi opozitën se po kërkon ndaljen e dialogut, vetëm pse është në opozitë, sepse sipas tij, ndryshe do të vepronte po të ishte në pushtet, do dialogonte dhe ajo.
Ndërsa shefi grupit parlamentar të PDK-së Zenun Pajaziti, kërkoi unitet të spektrit politik në lidhje me qëndrimet rreth dialogut në mes Prishtinës dhe Beogradit si dhe për ngjarjet në veriun e Mitrovicës.
“Dialogu nuk ka një alternative tjetër, duhet japim shancin dialogut dhe të shpresoj që vetëm në këtë mënyrë të normalizohen marrdhëniet”, tha Pajaziti.
Ismet Beqiri i LDK-së, ndau mendim të njëjtë me shefin e tij për çështjen e dialogut, duke thënë se falë tij kanë ndodhur ndryshime pozitive në veri.
“Dialogu ka dhënë rezultate në integrimin të komunitetit serb dhe forcimin e shtetit për normalizimin e gjendjes në veri. Ka tentime nga Beogradit t’i ik zbatimit të marrëveshjeve dhe të provokojë situata si rastet e fundit”, tha Beqiri.
Deputeti i Vetëvendosje-s, Albin Kurti, ia kujtoi Veselit dhe Thaçit takimin që zhvilluan menjëherë me qytetarët shqiptarë të veriut ku siç tha “i penguan ata që të shkojnë në spitale”.
Kurti poashtu pyeti kryeministrin Mustafa se pse pranoi që rruga “Mbreti Pjetër” të shndërrohet në rrugë për këmbësorë?
Ai tha se qyteti i Mitrovicës është i ndarë me Urën e Ibrit dhe jo me mure.
Kurti, më tej tha se Vetëvendosje është për dialog, por dialog pa kushte e pa parime.
“Çdo temë e ka caktuar Serbia. Ky dialog është nënshktrim”, tha Kurti,
Pal Lekaj, kryetar i grupit parlamentar të AAK-së, tha se strukturat ilegale serbe nuk janë shuar, as në shëndetësi as në arsim e askund tjetër.
Kurse për dialogunm tha se formati është jo serioz dhe duhet shkuar me platformë të qartë.
“Dialog në forcimin e shtetit, dialog për zhvillim për të gjithë qytetarët, dialog për integrim të qytetarëve serb në institcionet e vendit dhe dialog për normalizim. Jemi për dialog konstruktiv mes palëve, njohje reciproke dhe zhvillim ekonomik të qytetarëve pa dallime. Dialogu në këtë format asgjë të mirë nuk i ka sjell vendit”, tha Lekaj.
Ndërsa Zafir Berisha nga NISMA tha se strukturat paralele në veri qëndrojnë dhe ato veprojnë shumë fuqishëm të koordinuara me Vuçiçin.
“Një pjesë janë kamuflu me uniforma të institcioneve, ndërsa e kanë vendin në burgun e Dyzit”, tha Berisha.
Vetëvendosje në fund të debatit pritet të dalë me një rezolutë, por kryeminsitri Mustafa kërkoi nga deputetët të mos e përkrahin atë pasi tha se nuk parasheh zgjidhje por vetëm shpreh mllefin opozitar. /tesheshi.com/
