Kuvendi i Kosovës, si shpeshherë, as sot nuk ka mundur ta përfundoi seancën plenare ashtu siç duhet. Seanca është ndërprerë në mungesë kuorumi. Mbylljen e seancës para kohës e ka bërë nënkryetarja, Aida Dërguti.
Për sot ishte paraparë një interpelancë e ministrit për Zhvillim Ekonomik Blerand Stavileci në lidhje me kontratën e privatizimit të kompanisë për distribuim të energjisë elektrike.
Mungesa e deputetëve të mazhorancës ka nervozuar opozitarët Albulena Haxhiu (VV) dhe Zafir Berisha (NISMA) të cilët deklaruan se vendi duhet të shkoj në zgjedhje.
“Deputetët e pushtetit si zakonisht pas pauzës nuk kthehen në Kuvend…ma me rëndësi po kanë me vazhdu fushatën… Kjo foto e sallës tregon se kush punon për shtet e kush për pushtet”, ka shkruar deputetja Haxhiu në Facebook.
Ndërsa, deputeti Berisha ka thënë: “Të shkojmë në zgjedhje, pasi shumica s’po mund ta bëjë kuorumin dhe për këtë e kanë akuzuar opozitën. Të vjen një legjislaturë tjetër që mund ta bëjë këtë”
Seanca pritet që të mbahet javën e ardhshme. /tesheshi.com/
