Kuvendi i Kosovës do të mbaj nesër seancë të rregullt plenare, por Demarkacioni nuk është në rend dite, ndonëse nga qeveria u paralajmërua se këtë javë do dërgohet para ligjvënësve për ratifikim.
Deputetja e NISMA-s Valdete Bajrami pas mbledhjes së Kryesisë së Kuvendit bëri të ditur se në seancën e së nesërmes nuk do të jetë në rend dite çështja e demarkacionit.
Kurse, deputetja Aida Dërguti, nga Lëvizja Vetëvendosje, deklaroi se thirrja për mbledhje të kryesisë në gjysmë të natës nënkupton “personalizim të Kuvendit”.
“Mbrëmë pas orës 22:00 u njoftuam për mbledhje të Kryesisë së Kuvendit që nuk është urgjente por me pika të mbetura nga seancat e kaluara. Ky është personalizim i Kuvendit. U krijuan pritshmëritë se mund të jetë çështja e demarkacionit meqë ftesa për mbledhje u bë pak para mesnatës”, tha Dërguti.
Ndërkaq, Xhavit Haliti nga PDK konfirmoi se nesër do të ketë seancë me interpelanca, ndërsa javën e ardhshme do të ketë seancë të re.
Kurse, sa i përket Demarkacionit, ai tha se “është obligim i qeverisë që ta sjellë në Kuvend”.
Haliti foli edhe për mocionin e mosbesimit nga ana e opozitës, duke thënë se opozita gjithmonë kërkon zgjedhje por nuk është ajo që vendosë për zgjedhje.
“Institucionet nuk funksionojnë mbi kërkesat e opozitës”, tha Haliti.
Ndryshe, në këtë takim të Kryesisë nuk ishte i pranishëm kryeparlamentari Veseli, i cili në mëngjes ka zhvilluar një takim të fshehtë me presidentin Thaçi në një nga lokalet e Prishtinës. /tesheshi.com/
