Kuvendi i Kosovës me 86 vota të deputetëve ka votuar votuar projektligjin për ratifikimin e Marrëveshjes së Stabilizim Asociimit (MSA) me Bashkimin Evropian.
Pas miratimit të saj deputetët dhe kabineti qeveritar janë ngritur në këmbë duke duartrokitur. Ndërsa, kryekuvendari Kadri Veseli ka shprehur urimet e tij për miratimin e Projektligjit për MSA-në.
“Urime të gjithë qytearëve të Kosovës dhe gjithë deputetëve”, ka thënë Veseli.
Kjo marrëveshje është nënshkruar javën e kaluar në Strasburg, duke shënuar edhe hapin e parë të marrëdhënieve kontraktuale me BE-në.
Tri partitë opozitare VV, AAK, NISMA kanë marrë pjesë vetëm në pjesën e parë të seancës ku kanë shpalosur qëndrimet e tyre dhe më pas kanë bojkotuar atë. Sipas tyre, Marrëveshja për Stabilizim Asociim ka shumë të meta – pos tjerash, ajo e trajton Kosovën jo si shtet, por me fusnotë dhe pa emërtimin Republikë në të.
Partitë opozitare nuk kanë bërë ndonjë aksion dhe kanë lejuar zhvillimin normal të seancës.
Prezente në sallë gjatë gjithë kohës ka qenë edhe presidentja Atifete Jahjaga. /tesheshi.com/
