Pas disa orëve debat, Kuvendi i Kosovës nuk ka arritur të miratojë rezolutën e propozuar rreth zbardhjes së fatit të personave të zhdukur në luftën e fundit. Kjo për faktin se nuk pati kuorum, meqë në sallë nuk ishin të pranishëm 61 deputetë, aq sa nevojitën për të mundur të votohet kjo rezolutë.
Rezoluta u la të votohet në seancën e 3 majit, kur është planifikuar të mbahet seanca plenare e radhës.
Mos miratimi i kësaj rezolute ka ngjallur reagimin e kryekuvendarit Kadri Veseli i cili ka kërkuar t’iu hiqen mëditjet deptuetëve që munguan në seancë, çka u kundërshtua nga deputeti Daut Haradinaj duke thënë se disa deputetë kanë shkuar për homazhe në varrezat e Mejës.
Reagime kanë ardhur edhe nga ish-deputetë dhe shoqëria civile.
Kreu i partisë FJALA, ish-deputeti Gëzim Kelmendi e ka quajtur turp për Kuvendin mosmiratimin e rezolutës, ndërsa mungesën e deptuetëve e ka lidhur me rastin e gylenistëve kur ishin të gjithë prezentë.
“Turp, turp. Nuk miratohet rezoluta për të zhdukurit tanë, ngase nuk ka kuorum ( mungojnë deputetët). Sot deputetët e Kuvendit të Kosovës debatuan për të zhdukurit tanë që ende nuk po i kthen Serbia. Gjatë fjalimit të tyre, secili u tregua ma patriot se tjetri. Por në fund të seancës kur duhej që të votohej rezoluta, ata kishin shkuar. Kështu që nga 120 deputetë sa ka Kuvendi, vetë 56 ishin në sallë. Kjo është dëshmi e qartë se sa iu intereson çështja e të zhdukurve tanë. Mos të harrojmë se po këta deputet javë më parë ishin shumë më të interesuar për 6 ” gylenistët” e arrestuar. Lidhur me arrestimin e 6 gylenistëve kishin mundësuar kuorumin, kishin votuar rezolutën dhe kishin formuar komision hetimor. Vërtetë turp për deputetët e Kuvendit të Kosovës. Ma shumë brengosen për 6 ” gylenistët” e Turqisë dhe politikën e Presidentit Erdogan, se sa për të zhdukurit tanë që ende nuk po i kthen Serbia. A thua këta deputetë paguhen nga FETO apo nga qytetarët e Kosovës?”, shkruan Kelmendi në Facebook.
Ndërsa Agron Demi nga Instituti GAP ka ironizuar me deputetët që munguan duke thënë se kanë shkruar mëditjet dhe janë duke u bërë gati për festën e 1 Majit.
“Fotot me lule para memorialeve i kanë publiku në facebook, nënshkrimet për meditja i kanë vënë (98 nënshkrime), tash garant janë rrugës për pushimin e gjatë të ‘1 majit’”, shkruan Demi. /tesheshi.com/
