Kuvendi i Kosovës do të nisë sesionin e ri parlamentar javën e ardhshme, kur Kryesia të thërrasë njërën nga seancat plenare. Sesioni i punimeve të Kuvendit fillon të hënën e tretë të muajit janar për të ashtuquajturën “sesion pranveror”.
Nisjen e punës së Kuvendit e ka konfirmuar këtë javë edhe kryeparlamentari, Kadri Veseli, gjatë një takimi me ambasadorin amerikan në Kosovë, Greg Delawie.
Shefja e grupit parlamentar të AAK-së, Donika Kadaj-Bujupi është shprehur e vendosur, që opozita të vazhdojë bllokimin e Kuvendit, ndërsa tani do të kërkojë edhe largimin e qeverisë, që, siç tha ajo: “ ka shkelur Kushtetutën dhe nuk mund të qëndrojë me dhunë në pushtet.”
“Për metodat dhe mënyrën sesi do të veprojë opozita për bllokimin e Kuvendit, apo me çfarë mjetesh do ta bllokojmë punën, do të vendosim në momentin e caktimit të datës së seancës së re”,- tha deputetja Kadaj-Bujupi për TCH.
Edhe pse në faqen zyrtare të internetit të Kuvendit, tanimë janë publikuar oraret e mbledhjeve të komisioneve parlamentare për javën e ardhshme, deputetja Kadaj-Bujupi tha se, opozita do t’i bojkotojë ato./tesheshi.com/
