Sesioni i ri i Kuvendit nisi me një axhendë të pazakontë, të detyruar nga kërkesa e prokurorisë për heqjen e mandatit të deputetit socialist, Armando Prenga i përfshirë në një konflikt të armatosur mbrëmjen e së premtes në Laç.
Deputetët e miratuan heqjen e mandatit të tij me 118 vota pro, asnjë kundër e asnjë abstenim, por seanca e cila ka qenë unanime në këtë votim, ka nisur me debate të ashpra sa i takon bllokimit të një avioni me drogë në Itali, që ishte nisur nga Shqipëria si dhe dekriminalizimit.
Ish-kryeministri Sali Berisha akuzoi kryeministrit Edi Rama për përfshirje të kriminelëve në parlament. “Kuvendi, tha ai, është kthyer në një strofull të kriminalitetit”.
“Futi kriminelët në Parlament. Parlamenti është kthyer në strofull e kriminalitetit”, tha Berisha.
Ndërsa, përpara votimit për mandatin e Prengës, kreu i Kuvendit ka ftuar opozitën të bashkëpunojë në prioritetet e legjislaturës së re, të cilat janë dekriminalizimi dhe reforma në Drejtësi.
“Reforma e drejtësisë duhet t’u shërbejë qytetarëve dhe t’i rezistojë kohës. Integrimi në Bashkimin Evropian, prioriteti ynë madhor, ndërkohë që bashkëpunimi pozitë-opozitë duhet të mundësojë procesin e dekriminalizimit”, tha Meta.
Shefi i grupit parlamentar të PD-së, Edi Paloka ka sjellë në vëmendje të deputetëve kapjen, sipas tij, të një “tjetër mushkonje droge” në Itali.
“Shqiptarët e dinë kush i nis avionët që kapen në Itali. Dhe qeveria ndaloi atë polic që informonte italianët e që sot denoncon hapur trafikun”, tha Paloka.
Në përgjigje të akuzave, ministri i Brendshëm, Saimir Tahiri ka deklaruar se, “qytetarët e kanë shumë të qartë dallimin mes nesh dhe atyre që qeverisën për 8 vjet”.
“Policit që flet për trafik droge i keni blerë toka në bregdet”, tha Tahiri duke iu drejtuar opozitës. Sipas tij, ndalimi i avionit me drogë u bë i mundur nga bashkëpunimi policor mes Shqipërisë dhe Italisë. /tesheshi.com/
