Nga Blendi Gashi
Presidenti i zgjedhur Hashim Thaçi ka thënë se posa ta jap betimin, do t’i ftojë partitë politike në takim për të biseduar rreth gjetjes së një kompromisi mes palëve për t’i dhënë fund krizës politike.
Një ftesë e tillë edhe mund të ndodh, por opozita kosovare vështirë se do të pranojë të shkoj të ulet në tavolinën e Thaçit nëse paraprakisht nuk ofrohet një zgjidhje konkrete, e ajo do të ishte caktimi i datës së mbajtjes së zgjedhjeve të parakohshme, kërkesë tashmë kjo e thënë nga VV, AAK e NISMA.
Thaçi: Pozitën e opozitën më shumë gjëra i bashkojnë se i ndajnë
Presidenti i zgjedhur, Hashim Thaçi, në një intervistë dhënë për mediat kosovare ka thënë se opozitën dhe pozitën kosovare ka më shumë gjëra që i bashkojnë sesa që i ndajnë.
“Do të diskutojmë me ta për mundësinë e bashkëpunimit për çështjet që na bashkojnë. Çështje që na bashkojnë ka më shumë se çështje që na ndajnë. Unë do të jem në shërbim të të gjithë spektrit politik”, ka deklaruar ai.
Përkundër këtij deklarimi dhe qasje unifikuese që mundohet ta prezantojë presidenti Thaçi, përfaqësues të opozitës thonë se në Presidencë mund të shkohet vetëm nëse caktohet data për shpalljen e zgjedhjeve të reja e në asnjë variant tjetër.
Isufi i AAK-së: Së pari duhet të shpërbëhet Parlamenti
N/kryetari i Aleancës për Ardhmërinë e Kosovës (AAK), Ahmet Isufi, thotë se së pari duhet të shpërbëhet Parlamenti dhe të vendoset për shkuarje në zgjedhje të reja.
“Opozita e bashkuar do të dakordohet mes vete por së pari duhet të shpërbëhet Kuvendi i Kosovës të merret vendimi për shkuarja në zgjedhje të parakohshme dhe më pas mund të shkohet për të biseduar për të caktuar datën e zgjedhjeve”, ka thënë Isufi, për tesheshi.com.
Analistët: Veç për zgjedhje shkojnë te Thaçi
Njohësit e rrethanave politike në vend thonë se nëse ftesa e Thaçit nëse nuk bëhet me qëllim konkret, siç është shkuarja në zgjedhje të reja, atëherë çdo gjë do të ishte e pakuptimtë sepse opozita nuk shkon për të biseduar veç sa për të thënë me Thaçin.
Analisti politik Islam Krasniqi, deklaratën e presidentit Thaçi e sheh si shoë vetëm për media, sepse thotë se edhe ai vet e di që opozita vetëm në një rast do të shkonte të ulej në tryezë me të.
“Partitë opozitare asnjëherë nuk do t’i përgjegjën fteses së z. Thaçi, të cilin e akuzojnë si aktor kryesor të gjithë kësaj krize politike. Nuk besoj se opozita do t’i përgjigjet një ftese të tillë, me përjashtim në rast të caktimit të datës së zgjedhjeve.
Presdenti ri nuk ka ndonjë platformë që do t’i bindë opozitën për t’u kthyer në Kuvend, por ai do t’i injorojë që t’ja ngushtoj veprimin e qeverisë, se, ai e arriti qëllimin e tij dhe as që i intereson për gjëra të tjera, pos deklaratave mediatike, dhe ka mundësi që i tërë ky skenar ka qenë i përgatitur nga vet z. Thaçi”, thotë Krasniqi për tesheshi.com.
Ali Hertica, njohës i rrethanave politike në vend nuk beson se partitë opozitare do të pranojnë të ulen në një tryezë me Thaçin për të folur për tejkalimin e ngërçit politik.
Ai në një prononcim për tesheshi.com thotë se një gjë e tillë nuk mund të ndodh sepse Thaçi është faktori kryesor për bllokadën politike në vend.
“Thirrja e Thaçit që t’i takojë partitë politike të dalin nga ky kolaps politik nuk do të ketë sukses. Shkurja e opozitës te Thaçi do të thoshte nënshtrim i opozitës së bashkuar”, thotë Hertica.
Ndryshe, Thaçi, pritet të marrë mandatin më 7 prill 2016, kur do ta japë edhe zyrtarisht betimin në Kuvend para të zgjedhurve të popullit. /tesheshi.com/
