Nga Blendi Gashi
Parlamenti i Kosovës i dalë nga zgjedhjet e 11 qershorit do të ketë një përbërje pothuajse krejt tjetër nga legjislatura e pestë që njihet edhe si më e dobëta që nga paslufta pas përdorimit të gazit lotsjellës dhe ligjeve të pakta të miratuara.
Përveç shumë emrave të rinj që do ulën për herë të parë në institucionin ligjvënës, risi është se shuma emra të njohur të skenës politike kanë dështuar të fitojnë besimin e qytetarëve, apo ata që njihen si deputetë “veteran”.
Elektorati siç duket është ngopur me mospunën e disa zyrtarëve kryesorë të partive të cilët për disa vite më shumë vetëm kanë nxehur karrigen dhe kanë përfituar të mirat material, por nuk është se kanë ngritur zërin për problemet e qytetarëve.
Dhe kjo ka bërë që qytetarët më së shumti ta përkrahin Vetëvendosje-n si parti të vetme e cila ka fituar 31 deputet nga 14 sa kishte në legjislaturën e fundit, pastaj LDK-ja si parti e vetme me 24 deputet dhe më së shumti kanë ndëshkuar PDK-në e cila ka fituar e vetme vetëm 21 deputet.
Një deputet e ka humbur sipas rezultateve të deritanishme edhe AAK-ja e cila ka fituar e vetme 10 deputet ndërsa kishte 11, kurse NISMA e Fatmir Limajt nga gjashtë deputet është rritur në tetë deputet.
Ja “veteranët” e PDK-së që u ndëshkuan nga elektorati
PDK-ja në legjislaturën e gjashtë pritet të ketë një fytyrë krejt tjetër. Shumica e zyrtarëve të lartë të kësaj partie nuk do jenë më në ulësen e deputetit. Disa prej tyre kanë dështuar të siguorjnë ulëse e disa të tjerë fare nuk janë kandiduar.
Ndonëse është pritur që dy zyrtarët e lartë të kësaj partie, profesorët Hajredin Kuçi e Arsim Bajrami të sigurojnë pa problem votat ata anë ndëshkuar nga elektorati.
Por këto nuk janë figurat e vetme të PDK-së që nuk arritën të marrin përkrahjen e qytetarëve për deputet.
Edhe të zëshmit e legjislaturës së kaluar, Selvije Halimi, Luljeta Veselaj-Gutaj, Abdyl Imeri, Bislim Zogaj, Nait Hasani, Rafet Rama, Shaip Muja e Hajdar Beqa edhe pse ishin në garë nuk arritën të fitojnë besimin e qytetarëve.
Ndërsa ish-deputetët Nuredin Lushtaku, Naim Fetahu, Fadil Beka, Besim Beqaj, Adem Grabovci, Nehat Baftiu, Agim Çeku, Shukri Buja, Fatmir Shurdhaj e Salihe Mustafa nuk kanë qenë të përfshirë fare në listën e PDK-së).
Ndërsa fytyrat e reja të PDK-së do jenë Mërgim Lushtaku, djali i Sami Lushtakut, pastaj Andin Hoti djali i Ukshin Hotit dhe Evgjeni Thaçi-Dragusha.
“Veteranët” e LDK-së që nuk fituan mandatin e deputetit
Edhe disa zyrtarë të lartë të LDK-së për herë të parë janë ndëshkuar nga elektorati duke mos marrë votat e nevojshme për deputet, ndërsa janë përkrahur të aderuarit e rinj nga shoqëria civile.
Për herë të parë Skënder Hyseni e Sabri Hamiti nuk arrit të fitojnë votat për deputet. Jashtë kanë mbetur edhe ish-deputetët e legjislaturës së fundit si Ali Sadriu, Sali Morina, Doruntina Maloku, Muhamet Mustafa, Nuredin Ibishi, Njomza Emini dhe Melihate Tërmkolli.
Ndërsa ish-deputetët Adem Salihaj, Shpejtim Bulliqi, Fatmir Rexhepi e Hatim Baxhaku nuk janë përfshirë fare në listë.
Kurse për herë të parë deputet që do e përfaqësojnë LDK-në janë Lumir Abdixhiku, Driton Selmanaj, Valentina Bunjaku-Rexhepi, Fidan Rekaliu, Vebi Imeri e Sokol Havolli.
“Të ndëshkuarit” e AAK-së
Nga partia e Haradinajt, statusin e deputetit sipas rezultateve preleminare e kanë humbur Ali Berisha e Lahi Brahimaj, ndërsa Ahmeti Isufi, Shkumbin Demaliaj e Blerim Kuçi do kthehn sërish si deputet pas va citeve, ndërsa për herë të parë në Kuvend do të ulet Rasim Selmanaj.
VV me plus 17 deputet, ende s’dihen kush nga ish-deputetët mbeti jashtë
Për dallim nga partitë tjera, ende asnjë listë nuk është bërë publike nga Vetëvendosje që do tregonte se kush nga ish-deputetët kanë humbur mandatin e kush nga kandidatët e rinj ka fituar ulëse në Parlament.
Por duke ditur se ka fituar 17 deputet më shumë se më 2014, VV do ketë numrin më të madh të deputetëve të rinj, ndërsa disa nga ish-deputetët e saj pritet të sigurojnë sërish mandatin.
NISMA me dy deputetë të rinj
Partia NISMA që po konsideron vetën si fituesen më të madhe në zgjedhjet e 11 qershorit, do përfaqësohet në mandatin e ri me 8 deputetë.
Nga ish-deputetët, jashtë ka mbetur vetëm Shukrije Bytyqi e cila fare nuk është futur në listë kurse deputet të ri të kësaj partie janë ish-gazetari Milaim Zeka dhe Albuena Balaj, kurse Fatmir Limaj, Haxhi Shala, Enver Hoti, Valdete Bajrami e Zafir Berisha kanë rifituar mandatin.
Kujtojmë se KQZ-ja ka paralajmëruar se deri më 25 qershor do të kryejë procedurat e numërimit të votave që do të japin rezultatet zyrtare preliminare për deputetët e rinj. /tesheshi.com/
