Krijuesit e një dokumentari të ri rreth vrasjes së gazetares së Al Jazeera-s, Shireen Abu Akleh, pretendojnë se kanë zbuluar identitetin e ushtarit izraelit që e kreu vrasjen.
Dokumentari 40-minutësh “Kush e vrau Shireenin?”, i publikuar të enjten nga kompania mediatike Zeteo me seli në Uashington, e identifikon vrasësin si një ushtar 20-vjeçar izraelit i cili ishte në misionin e tij të parë luftarak në Bregun Perëndimor të pushtuar dhe ekspozon përpjekjet amerikane për t’i shpëtuar përgjegjësisë për vrasjen aleatit të tyre, Izraelit.
Dion Nissenbaum, producenti ekzekutiv i dokumentarit, i tha Al Jazeera-s se krijuesit e filmit nisën të zbulonin se kush qëndronte saktësisht pas vrasjes – një sekret që Izraeli e ka mbajtur të fshehur deri më tani, sipas Zeteo, dhe se ata shpresojnë që zbulimi do të çojë në hetime të mëtejshme nga SHBA-të.
Administrata e ish-Presidentit të SHBA-së Joe Biden “arriti në përfundimin e hershëm se një ushtar izraelit e kishte shënjestruar qëllimisht atë, por ky përfundim u përmbys nga brenda”, tha ai.
“Kemi gjetur disa prova shqetësuese që tregojnë se si Izraeli ashtu edhe administrata e Bidenit e kanë mbuluar vrasjen e Shireen dhe e kanë lejuar ushtarin të arratiset pa dhënë asnjë përgjegjësi”, shtoi ai.
Anton Abu Akleh, vëllai i Shireen, tha se dokumentari ishte “shumë i rëndësishëm” për familjen e saj.
“Jam i sigurt se kjo do të hedhë më shumë dritë dhe do të vërtetojë se ushtria izraelite e ka shënjestruar sistematikisht atë, si dhe gazetarë të tjerë në Palestinë”, tha ai.
Dokumentari përmban intervista ekskluzive jo vetëm me ish-zyrtarë amerikanë, por edhe me ish-zyrtarë dhe ushtarë të lartë izraelitë, si dhe gazetarë që e njihnin personalisht Shireen.
“Shpresojmë që njerëzit të kujtojnë se çfarë ikone ishte Shireen”, tha Nissenbaum.
“Vrasje me gjakftohtësi”
Abu Akleh mbante veshur një helmetë dhe një jelek gazetareje të shënuar qartë kur u vra ndërsa raportonte për një sulm izraelit në kampin e refugjatëve në Jenin më 11 maj 2022, në një akt të dënuar nga rrjeti mediatik Al Jazeera si një “vrasje me gjakftohtësi”.
Hetimet për vrasjen e saj nga agjencitë e lajmeve, grupet e të drejtave të njeriut dhe Kombet e Bashkuara arritën në përfundimin se Ab Akleh u vra – ndoshta qëllimisht – nga ushtarë izraelitë.
Izraeli fillimisht u përpoq të shmangte fajin për incidentin, duke sugjeruar se gazetarja u vra nga luftëtarët palestinezë, por përfundimisht e tërhoqi atë pretendim dhe pranoi se forcat e tij ishin përgjegjëse për vdekjen e saj, duke thënë se ishte një “aksident”.
Një vit më vonë, ushtria izraelite njoftoi se i vinte “thellësisht keq” për vdekjen e Abu Akleh, por shtoi se nuk do të niste procedura penale kundër ushtarëve që besohet se janë përgjegjës për vrasjen.
SHBA-të hoqën dorë nga kërkesa e tyre për një hetim pas kërkimfaljes izraelite.
Vrasja e Abu Akleh tronditi botën dhe përqendroi vëmendjen ndërkombëtare te vrasjet izraelite të gazetarëve palestinezë.
Organizata “Reporterët pa Kufij” raportoi të premten se forcat izraelite vranë gati dyqind gazetarë në 18 muajt e parë të sulmit të Izraelit në Gaza, të paktën 42 prej të cilëve u vranë ndërsa kryenin punën e tyre. /tesheshi.com/
