Albin Kurti, kandidati për kryeministër nga Vetëvendosje, ka përsëritur qëndrimin se programi i kësaj partie nuk parasheh ndalimin e femrës me mbulesë për t’u arsimuar e punësuar në administratën publike.
Ai ka thënë se çdo femër mbi moshën 16-vjeçare është e lirë të vendosë për veten e saj. Më tej, Kurti është shprehur dhe kundër paragjykimeve që kanë për shënjestër ndjekësin e një besimi.
Në kuadër të kësaj, duke folur në “Rubikon” të KTV-së, Kurti tha se presidenti Hashim Thaçi, ish-kryeparlamentari Kadri Veseli dhe disa media pranë tyre, po fryjnë më shumë se ç’duhet debateve fetare.
“Jemi kundër radikalizmave por edhe kundër paragjykimit të besimtarëve. Thaçi, Veseli dhe mediat e tyre u fryjnë debateve fetare. Çka thotë një hoxhë e lëshojnë pas 8 muajsh, kur t’iu konvenon. Në historinë tonë kemi edhe fenë islame, dhe ortodokse, dhe katolike. Kemi edhe ateistët. Jemi kundër ndalimit të mbulimit. E konsiderojmë moshën 16-vjeçare si moshë të pjekurisë, kur merr letërnjoftim dhe VV e ka në program që edhe me moshën 16-vjeçare mund të votosh”, ka thënë njeriu që pretendon të marrë frenat e qeverisjes së Kosovës pas 11 qershorit. /tesheshi.com/
