Drejtuesit e institucioneve ndërkombëtare dhe ambasadorët kanë reaguar për incidentet e shënuara të martën në komunat me shumicë serbe në veri të Kosovës, në Mitrovicën e Veriut dhe në Zubin Potok, ku po përgatiten zgjedhjet e jashtëzakonshme për kryetarë komunash pas daljes së Listës Serbe nga institucionet.
Ambasadori amerikan në Kosovë, Jeff Hovenier, ka deklaruar në reagimin e tij se në këtë moment nuk janë krijuar kushtet për mbajtjen e zgjedhjeve të jashtëzakonshme në katër komunat veriore, të planifikuara për 18 dhjetor. Hovenier theksoi se siguria e të gjithë qytetarëve të Kosovës duhet të jetë prioriteti më i lartë.
“Shtetet e Bashkuara janë të shqetësuara se në këtë kohë nuk janë krijuar kushtet që zgjedhjet të mbahen në fund të këtij muaji në veri të Kosovës. Siguria e të gjithë qytetarëve të Kosovës duhet të jetë prioriteti më i lartë. Kërkojmë nga të gjithë të përfshirët për të ushtruar përmbajtje”, shkroi Hovenier në Twitter.
Hovenier vuri në dukje se përdorimi i dhunës dhe i frikësimit nuk është kurrë një metodë e përshtatshme proteste.
“SHBA dënon ata që kanë përdorur dhunë gjatë incidenteve të djeshme në veri të Kosovës. Përdorimi i dhunës dhe frikësimit, duke përfshirë përdorimin e mjeteve shpërthyese dhe rrezikimin e jetëve nuk është kurrë një metodë e përshtatshme proteste, në asnjë rrethanë,” shtoi Hovenier.
Edhe shefi i Misionit të Bashkimit Evropian për Sundimin e Ligjit në Kosovë (EULEX), Lars Gunnar-Wigemark, është shprehur i shqetësuar pas incidenteve të regjistruara. Wigemark përmes një postimi në rrjetet sociale ka kërkuar qetësi, duke thënë se EULEX-i do të vazhdojë të monitorojë situatën në bashkëpunim të ngushtë me Policinë e Kosovës dhe misionin e NATO-s në Kosovë (KFOR).
“Ne jemi të shqetësuar për incidentet e djeshme në veri të Kosovës. Çdo protestë duhet të jetë paqësore dhe të gjithë duhet të qëndrojnë të qetë dhe të përmbajtur. EULEX-i në Kosovë do të vazhdojë të monitorojë situatën në koordinim të ngushtë me Policinë e Kosovës dhe KFOR-in”, ka shkruar Wigemark në Twitter.
Në të njëjtën kohë, kryeministri i Kosovës Albin Kurti paralajmëroi se numri i policëve do të rritet pas incidenteve në veri, ndërsa fajësoi presidentin serb Aleksandar Vuçicc për orkestrimin e sulmeve.
“Me këto krime dhe sulme të armatosura në veri të Ibrit, sigurisht që do të kemi më shumë policë të Kosovës. Sepse do të ketë hetime dhe ndjekje penale të këtyre kriminelëve, të paguara nga Serbia dhe të drejtuara nga presidenti i saj. Shkeljet e shumta të ligjit nuk do të falen dhe tendencat e destabilizimit kriminal do të dështojnë, tha Kurti.
Në Zubin Potok dhe në Mitrovicën e Veriut të martën, zyrtarët zgjedhorë komunalë dhe policët, në përpjekje për të hapur zyrat e komisioneve komunale zgjedhore, janë sulmuar me bomba trullosëse dhe të shtëna në ajër, njoftoi Policia e Kosovës.
https://youtu.be/Wk3fkIkGwhA
Si rezultat, ata nuk kanë mundur të vazhdojnë procesin përgatitor për zgjedhjet e parakohshme në veri.
Kryetari i KQZ-së Kreshnik Radoniqi ka thënë mbrëmë se duket se qasja në veri është e kufizuar dhe ka vlerësuar se është e padrejtë të rrezikohet jeta e zyrtarëve të KQZ-së dhe se pret mendimin e presidentes Vjosa Osmani për hapat e ardhshëm.
Zgjedhjet e jashtëzakonshme në komunat në veri të Kosovës u shpallën pasi përfaqësuesit serbë u larguan nga institucionet e Kosovës për shkak të vendimit për targa. Lista Serbe, kryetarët e së cilës dhanë dorëheqje në fillim të nëntorit, nuk ka aplikuar për zgjedhjet e jashtëzakonshme komunale. /tesheshi.com/
