Kryeministri i Kosovës Albin Kurti pajtohet me planin e ri të prezantuar nga anëtarët e delegacionit të lartë të Bashkimit Evropian, SHBA-së, Gjermanisë, Francës dhe Italisë gjatë vizitës së tyre në Kosovë, i cili do të jetë kornizë për bisedimet e mëtejshme, njoftoi Qeveria e Kosovës.
Përfaqësuesi special i BE-së për dialogun ndërmjet Kosovës dhe Serbisë, Miroslav Lajçak, i dërguari special i Shteteve të Bashkuara për Ballkanin Perëndimor, Gabriel Escobar dhe përfaqësues të Francës, Gjermanisë dhe Italisë, gjatë fundjavës së kaluar kanë vizituar Beogradin dhe Prishtinën.
“Bisedimet e Lajçakut në Beograd dhe Prishtinë ishin të fokusuara në atë se si të promovohet zbatimi i Marrëveshjes së Ohrit. Nuk ka asnjë qëllim për ta zëvendësuar atë marrëveshje”, tha më herët zëdhënësi i BE-së, Peter Stano.
Ai tha se liderët e Serbisë dhe Kosovës, Aleksandar Vuçiç dhe Albin Kurti, janë ftuar në fund të kësaj jave në Bruksel, ku do të diskutojnë për gjendjen e dialogut për normalizimin e marrëdhënieve në prag të samitit të BE-së.
Stano thekson se në takimet në Beograd dhe Prishtinë gjatë fundjavës janë diskutuar ide të ndryshme, disa prej të cilave kanë qenë edhe në formë të shkruar dhe se diskutimet do të vazhdojnë.
Vuçiç dhe Kurti, takime të ndara në Bruksel
“Kjo përfshin një propozim modern evropian për një statut të bashkësisë së komunave me shumicë serbe. Presim që të dyja palët të veprojnë shpejt dhe të tregojnë se janë të përkushtuar ndaj procesit të normalizimit duke përmbushur detyrimet e marra në dialog nga marrëveshja për rrugën e normalizimit dhe të gjitha marrëveshjet e mëparshme pa asnjë kusht dhe vonesë”, tha Stano.
Siç shkruhet në deklaratën e Qeverisë së Kosovës, Kurti është shprehur dakord që ky plan i ri të bëhet kornizë për vazhdimin e bisedimeve të mëtutjeshme me vendet aleate, SHBA-në, Gjermaninë, Francën dhe Italinë, dhe duhet të forcojë perspektivat e anëtarësimit në organizatat ndërkombëtare.
Samiti i BE-së do të mbahet të enjten dhe të premten, kurse Kurti dhe Vuçiç të enjten duhet të jenë në Bruksel.
Të njëjtat burime bëjnë të ditur se ky nuk është një takim mes të dyve, por se do të kenë takime të ndara.
Në prag të atij samiti, Kurti tha se nuk ka dialog me Serbinë nëse nuk ka sanksione apo dënime ndaj Beogradit pas asaj që bënë më 24 shtator në fshatin Banjskë, në veri të Kosovës.
“Nëse nuk do të ketë dënime dhe sanksione ndaj Serbisë pas asaj që bënë, definitivisht nuk do të ketë dialog. Do të përfundojmë në menaxhim të dështuar të krizës dhe do ta harrojmë plotësisht normalizimin”, tha Kurti.
Pasi Vuçiç dhe Kurti arritën marrëveshjen për rrugën e normalizimit të marrëdhënieve më 27 shkurt, në Ohër më 18 mars u pranua aneksi i asaj marrëveshjeje, që në fakt është plani i zbatimit i marrëveshjes së shkurtit.
Edhe pse anëtarët e BE-së pretendojnë se është arritur një marrëveshje për të dyja këto dokumente, asnjëra nuk është nënshkruar.
Vuçiç në disa raste ka deklaruar se nuk ka ndërmend të respektojë disa obligime që dalin nga ato marrëveshje, siç është dispozita se nuk do të bllokojë anëtarësimin e Kosovës në organizatat ndërkombëtare.
Ndërsa kryeministri Kurti nuk dëshiron të formojë një komunitet të komunave me shumicë serbe që do të kishte kompetenca të gjera, diçka si entiteti Republika Srpska në Bosnje.
Tensionet në marrëdhëniet ndërmjet Serbisë dhe Kosovës u rritën pas 24 shtatorit, kur rreth 30 anëtarë të një formacioni paraushtarak serb sulmuan Policinë e Kosovës fshatin Banjska me shumicë serbe dhe u barrikaduan në një manastir ortodoks.
Autoritetet e Kosovës kanë akuzuar Serbinë dhe Vuçiçin për sulmin, ndërsa Beogradi zyrtar mohon përfshirjen në këtë ngjarje.
Përgjegjësinë për organizimin e sulmit e ka marrë Milan Radoiçiç, ish-nënkryetari i Listës Serbe, partia më e madhe e serbëve të Kosovës.
Ai u lirua nga Gjykata Supreme e Serbisë, një ditë pasi u ndalua nën dyshimin se kishte kryer një sërë krimesh, përfshirë trafikimin e armëve dhe krimet kundër sigurisë publike. /tesheshi.com/
