Kryeministri i Kosovës Albin Kurti bisedoi të Enjten në Bruksel me Sekretarin e Përgjithshëm të Aleancës së Atlantikut të Veriut, Jens Stoltenberg, për situatën e sigurisë në Kosovë.
Sipas Qeverisë së Kosovës, Kurti shprehu mirënjohje për rolin historik të NATO-s në Kosovë dhe theksoi se prania e Aleancës është e një rëndësie të veçantë për forcimin e paqes dhe stabilitetit në vend dhe rajon.
Gjatë takimit, Kurti konfirmoi qëllimin dhe aspiratën e hapur të Kosovës drejt integrimit dhe anëtarësimit në NATO, i cili, siç vlerësoi ai, do të kontribuonte në sigurinë e rajonit dhe Evropës.
Kurti falënderoi Stoltenberg për ndihmën e KFOR-it dhe bashkëpunimin e tyre me institucionet e Kosovës në menaxhimin dhe përgjigjen ndaj pandemisë së virusit Corona.
Më vonë të enjten, kryeministri i Kosovës do të takohet me Presidenten e Komisionit Evropian Ursula von der Leyen dhe Përfaqësuesin e Lartë të Bashkimit Evropian për Punët e Jashtme dhe Politikën e Sigurisë Josep Borrell.
Kjo është vizita e parë e Kurtit në Bruksel që prej marrjes së detyrës së kryeministrit të Kosovës. /tesheshi.com/
