“Serbia bëri spastrim etnik administrativ të heshtur në Luginën e Preshevë që sjell pasoja të mëdha”, tha kryeministri i Kosovës, Albin Kurti gjatë takimit me përfaqësuesit politikë të shqiptarëve në Preshevë, Medvegjë dhe Bujanoc, ku ishin kryekomunarja e Preshevës, Ardita Sinani; kryekomunari i Bujanocit, Nagip Arifi; kreu i Partisë për Veprim Demokratik, Shaip Kamberi; si dhe kryetari i Këshillit Kombëtar Shqiptar, Ragmi Mustafi.
“Kjo metodë e Serbisë, që iu mohoi të drejtën elementare e demokratike, atë të votës, solli edhe rezultate jo të kënaqshme. Këto zgjedhja as nuk ishin të lira e as demokratike. Mungesa e unitetit dhe i bashkërendimit të subjekteve politike shqiptare në një front, ishte një faktor tjetër i dëmshëm për rezultatet zgjedhore, veçoi kryeministri”, tha kreu i qeverisë së Kosovës.
Kurti shtoi se gjendja e shqiptarëve në këto komuna, me politika diskriminuese e shtypëse të Serbisë, kërkon angazhim të përbashkët e vigjilencë të shtuar, vendosmëri e ruajtje të unitetit politik të subjekteve shqiptare.
“Pas shtypjes e diskriminimit që po u bëhet shqiptarëve nuk duhen mbështetur tentimet për acarim të shqiptarëve me njëri-tjetrin, pjesë e së cilës është edhe synimi për ta rrëzuar kryetaren e Preshevës, Ardita Sinani. Përçarja e ndarja janë gabim dhe sjellin dëme”, arsyetoi i pari i qeverisjes kosovare. /tesheshi.com/
