Nga Blendi Gashi
Dy partitë në pushtet PDK e LDK vazhdojnë të përplasen mes tyre nëse duhet shkuar apo jo në zgjedhje të parakohshme parlamentare.
Derisa disa zyrtarë të PDK-së haptas kanë shprehur dëshirën për prishjen e koalicionit, ata të LDK-së nuk po duan t’u përmendet kjo gjë duke thënë se mandati duhet çuar deri në fund.
Së fundmi, janë përplasur edhe dy zv.ministra që lirisht mund të thuhet se janë më të zëshmit në qeverinë “Mustafa”. Bëhet fjalë për zv. ministrin e Kulturës Rexhep Hoti dhe zv.ministrin e Pushtetit Lokal Bajram Gecaj.
E gjitha ka filluar pas një deklarate që ka bërë Hoti i PDK-së, i cili në një intervistë dhënë së fundmi për mediat kosovare ka thënë se “zgjedhjet janë të pashmangshme dhe se për këtë do të merret shpejt një vendim me partnerët e koalicionit”.
Ky qëndrim i Hotit siç duket e ka nervozuar Gecajn e LDK-së që ai dhe partia e tij nuk po duan ta prishin “martesën e zorit” me PDK-në. Përmes një statusi në Facebook, Gecaj “ia rikujton” Hotit marrëveshjen e koalicionit qeverisës.
“Z. Hoti sigurisht është i vetëdijshëm se ky koalicion qeverisës ka një marrëveshje për qeverisje, dhe se partitë serioze dhe institucionaliste respektojnë marrëveshjet, posaçërisht kur vetë kanë kërkuar dhe insistuar për një të tillë. Mosrespektimi i marrëveshjeve dërgon sinjale negative dhe brengosëse për marrëveshjet në të ardhmen, dhe atë jo vetëm te partia jonë”.
Gecaj, më tej në reagimin e tij flet për “përgjegjësinë para interesave të vendit dhe qytetarëve”, derisa shton se “zgjedhjet e parakohshme më së shumti do t’i hynin në pune opozitës”. Ndërkaq, ai mohon që LDK i frikësohet zgjedhjeve duke thënë se pohimi i tillë “është sa i gabuar aq edhe paragjykues, dhe tash e sa kohë bëhet me cinizëm dhe vetëm për të dëmtuar”.
Ky reagim i Gecajt siç duket nuk ka nervozuar Hotin i cili sipas një përgjigje shkurt dhënë për portalin kosovar lajmi. net shihet se nuk e vlerëson aq kolegun e tij nga LDK.
“Respekt për mendimin e gjithkujt, por personi për të cilin po flisni (Bajram Gecaj) nuk meriton t’i jep përgjigje”, ka thënë Hoti.
Ja ç’tha KE në raportin e progresit për “martesën e zorit” PDK-LDK
Kjo përplasje mes Hotit dhe Gecajt konfirmon deklarimet e Komisionit Evropian i cili në raportin për Kosovën, bëri të qartë se nuk ka bashkëpunim mes partnerëve të koalicionit.
“Bashkëpunimi i kufizuar ndërmjet ministrive të udhëhequra nga PDK-ja dhe LDK-ja e ka vështirësuar në ca raste arritjen e progresit në disa fusha kyçe të qeverisjes.Qeveria duhet t’i arrijë afatet e vendosura për disa plane pune dhe strategji me një koordinim më të mirë dhe me përmirësim të komunikimit ndërmjet partnerëve të koalicionit,” thuhet në raportin e KE-së për vitin 2015.
Andaj, duke parë këto fërkime të vazhdueshme të partnerëve që bëhen jo për (mos) punë, shtrohet pyetja; çfarë të mire mund të sjellë për qytetarët ky koalicion qeverisës nëse vazhdon të mbetet në këmbë deri në fund të mandatit kur brenda saj mungon fryma e bashkëpunimit?
Sigurisht, asgjë, përveç se kryeministri, kryekuvendari, ministrat, zv.ministrat e këshilltarët e tyre me bollëk do trashin xhepin e tyre. /tesheshi.com/
