Kur ura e Mitrovicës kalohej vetëm nga shqiptarë, e ajo e Shijakut nga shqiptarë e boshnjakë…

Nga Mark Brunga

Edhe pse është një kartolinë jugosllave që i përket vitit 1913, kohë kur serbët kishin nisur të lëshonin kthetrat e tyre mbi Kosovë, Ura e Ibrit aty rezulton tërësisht shqiptare. Edhe njëherë: është koha kur viset shqiptare të Kosovës, fuqitë e mëdha i kishin përfshirë në hartën e Serbisë, por ja që mbi urën e drunjtë që sot është bërë nishan i ndarjes mes shqiptarëve dhe serbëve, shfaqen vetëm shqiptarë që  kalojnë krejt lirshëm; e kjo për një fakt të thjeshtë: sepse banohej vetëm nga shqiptarë, e se ura ishte e tyre.

Është kartolinë e postave serbe e cila ka dy gjuhë në mbishkrimin e saj mbi foton e urës: gjuhën serbe me shkronja cirilike dhe gjuhën  franceze me alfabetin latin. Të dyja gjuhët tregojnë një diçiturë: “Mitrovica. Ura mbi lumin Ibër ”. Dhe gjëja tjetër serbe aty veç variantit cirilik në diçiturë, rezulton të jetë dhe figura ushtarake e një mbreti serb, që duke qenë një truk, shpreh simbolikisht dhe trukimin nacional që Serbia i ka bërë territorit kosovar në dhjetra dekada.

Siç vërehet pra, ura ka vetëm shqiptarë, të cilët identifikohen lehtësisht nga plisat e bardha që mbanin në kokë. Është dhe një tufë delesh të shoqëruara nga çobani, edhe ai me plis. Janë gjithsej 5 burra dhe një grua, ndërsa kjo e fundit është dhe e mbuluar, gjë që e identifikon lehtazi si shqiptare.

Simotra e Ibrit, Ura e Shijaku, ku kalonin dhe boshnjakë

Kësaj periudhe i përket edhe ura prej druri e Shijakut. Natyrisht që edhe mbi të kalonin vetëm shqiptarë. Me një ndryshim se në Urën e Shijakut qëllonte që kalonin lehtësisht muhaxhirë myslimanë  të ardhur nga Bosnja. Ato ishin pranuar vëllazërisht në rrethinat e Shijakut, pas konflikteve të armatosura me serbët.

Dhe që në atë periudhë e deri më sot, ato janë integruar në jetën politike dhe ekonomike te vendit duke e përdorur urën lehtësisht pa asnjë lloj konflikti racor a fetar. Me përjashtim të “konflikteve ” të dashurisë mes të rinjve nga të dyja komunitet të cilat kanë përfunduar me pas me martesa të përbashkëta.

Tashmë  kur konfliktet në dy anëve të Mitrovicës kanë marrë nam të zi, një foto tjetër e këtij qyteti e vitit 1966 e nxjerrë në shitje on line i cilëson mitrovicarët si shqiptarë të Kosovës. /tesheshi.com/