Në shenjë solidariteti me popullin e Rripit të Gazës, të krishterët ortodoksë në Betlehem e presin Krishtlindjen pa festë dhe ekskluzivisht me ceremoni fetare, ashtu siç ndodhi së fundmi gjatë Krishtlindjeve katolike.
Besimtarët po mblidhen në Bazilikën e Lindjes së Krishtit në qytetin e lindjes së Jezu Krishtit, por pa festë dhe eufori të madhe për shkak të sulmeve izraelite në Gazën e bllokuar, si dhe për shkak të rritjes së tensioneve në Bregun Perëndimor të pushtuar.
Kryebashkiaku i Betlehemit, Hanna Hananiya, tha se kishat dhe institucionet në Betlehem janë të pikëlluara dhe të zemëruara këtë vit nga sulmet izraelite në Rripin e Gazës dhe Bregun Perëndimor, të cilat kanë vrarë mijëra palestinezë, përfshirë fëmijë dhe gra.
“Ne po përjetojmë një luftë gjenocidale që po vazhdon prej tre muajsh, duke shkatërruar kisha, xhami, universitete dhe duke vrarë njerëz të pafajshëm. Ne po e kufizojmë festën tonë sot në ceremonitë fetare,” tha ai. /tesheshi.com/
