(Mos)ratifikimi i Demarakcionit me Malin e Zi nuk po sjell përplasje vetëm mes pozitës dhe opozitës, por edhe mes politikanëve të caktuar e njerëzve të mediave.
Kjo ka ngjarë të premten kur janë përplasur nga distanca vetëvendosësja Albulena Haxhiu dhe gazetari Adriatik Kelmendi i KTV-së, konkretisht autori i emisionit “Rubikon”.
E gjithë sherri ka pasur për bazë një proteste të një grupi njerëzish që kërkonin nga deputetët të japin votën pro dhe njëherë e mire ta mbyllin ceshtjen në fjalë, dhe sic thane t’i hapet rrugë, e që sipas deputetes Haxhiu pas saj ka qëndruar Kelmendi edhe pse ky i fundit nuk ka qenë mes protestuesve.
“Në protestën e sotme u vërejt mungesa e Adriatik Kelmendit. Organizatorët duhet të jenë në ballë të protestave, e jo të fshihen në zyra. Like-at nuk ecin në Shesh”, shkruan Haxhiu në Facebook.
Haxhiu: Kelmendi po bën presion mbi deputetët
Ajo nuk është ndal me kaq pasi me Kelmendin është marrë edhe me një status tjetër, duke e akuzuar se po bën thirrje tek deputetët të votojnë Demarkacionin, dhe po e krahason VV-në me Listen Serbe.
“Ka disa ditë që Adriatik Kelmendi ka nisur një fushatë dhe presion mbi deputetët e Kuvendit që të votojnë demarkacionin që i falë mbi 8200 ha, Malit të Zi. Kulmi i gjithë kësaj është kur në mënyrë të ulët mundohet të na krahasojë me Listën serbe dhe Rusinë. Fushata përbaltëse kundër nesh është e papranueshme! Duke qenë se Adriatiku, udhëheq emision në një televizion nacional, duhet të jetë neutral, profesionist dhe korrekt. Adriatiku e ka shumë lehtë kur bën thirrje për votim të një marrëveshje që falë territor! Nesër, pasnesër, ai nuk mban përgjegjësi as morale e as politike, besa as penale sepse janë deputetët që do të mbajnë përgjegjësi për veprimet e tyre. Sot, ende historia i mban mend emrat e njerëzve që kanë falur territor për karrige, njësoj është puna edhe me demarkacionin. Unë i bëj thirrje të njëjtit që të ngrisë zërin ndaj problemeve reale të qytetarëve, kritikat t’i ketë në adresën e duhur dhe konstruktive dhe të ndal fushatën përbaltëse kundër Lëvizjes. Mandati i deputetit është i lirë dhe nuk i nënshtrohet asnjë presioni a detyrimi!”, shkruan ajo.
Kelmendi: Haxhiu po shpif
Nuk ka vonuar dhe përgjigja e gazetarit e producenti në KTV, Adriatik Kelmendi i cili ka mohuar kategorikisht akuzat e bëra ndaj tij, për ka mohuar të ketë organizuar protestën para Kuvendit, duke thënë se po të kishte lidhje me dic të tillë do të tregonte.
“E di, kam opinion për shumë gjëra. E di se nuk hezitoj që ta shpreh opinionin tim publikisht. E di edhe se kam qenë shumë i qartë në ato që mendoj edhe për situatën e fundit politike për demarkacionin. E dini edhe ju! Natyrisht, me secilin opinion dikush mund të pajtohet, ose të mos pajtohet. Të më sfidojë me kundërargumente, nëse i ka. Mirëpo, është krejt e pandershme, si dhe e papranueshme, që dikush të më çojë porosi publike në stilin që e paska përdorur sot një deputete!.
Porosia e saj: Kujdes se çka po flet, se nëse nuk pajtohem unë me atë që thua – të sulmoj me shpifje! Ky është kërcënim publik për mua dhe të gjithë atyre që guxojnë ta thonë mendimin e tyre hapur, siç garantohet edhe me Kushtetutën e Republikës. Më mirë heshtni se shpifim për ju dhe pastaj ju linçojmë. Jo, nuk kam asfarë lidhje me asnjë protestë. Nëse do të kisha – do ta bëja të ditur. Pra, deputetja po shpif! T’i mbetet për nder shpifja. Mua gojën nuk do të ma mbyllë as jo, siç nuk ma ka mbyllur askush deri më sot!”, thuhet në reagimin e Kelmendit.
Asociacioni i gazetarëve: gjuha e deputetës, cenim i fjalës së lirë
Në këtë përplasje është përfshirë edhe Asociacioni i Gazetarëve të Kosovës, i cili i ka dale në ndihmë gazetarit Kelmendi, ndërsa konsideron se gjuha e deputetës Haxhiu është cenim i fjalës së lirë.
AGK-ja i kërkon Haxhiut që të distancohet nga përdorimi i çfarëdo gjuhe e cila e cenon integritetin profesional të gazetarit Kelmendi.
Përgatiti: Blendi Gashi – tesheshi.com
