Juventusi do të kërkojë trofeun e tretë radhazi të Kupës së Italisë, e të dymbëdhjetin në historinë e tij, kur të ritakohet me Lacion në finale përsëri pas dy sezonesh.
Gonzalo Higuain ishte lojtari më i parapëlqyer, më i dashur, i napolitanëve në tre sezonet e shkuara. Sot është pak të thuash që ai është i padëshirueshëm në “San Paolo”. Transferimi i tij te Juventusi verën e shkuar vazhdon të ngjallë po aq zemërim sa në ditën e parë.
Për të dytën herë brenda pak ditësh në këtë stadium, Higuain qe vendimtari për vajtjen në finale të Juventusit. Dy herë e kaloi argjentinasi ekipin e tij në epërsi; gola që rezultuan përcaktues për kualifikimin.
Napoli fitoi 3-2 mbrëmjen e së mërkurës, me golat të shënuar nga Hamsik, Mertens dhe Insigne. Një rezultat i pamjaftueshëm në fund, pasi Juventusi e kishte fituar 3-1 takimin e parë.
Ky qe takimi i dytë i këtyre dy ekipeve në pak ditë. Napoli e Juventusi do të barazonin 1-1 të dielën, një ndeshje e vlefshme për Serinë A. /tesheshi.com/
