Nisja e Kupës së Amerikës nuk ka qenë aspak mbresëlënëse, me katër gola në pesë ndeshje. Do të duhej të vinte takimi i gjashtë, ai mes Meksikës dhe Uruguajit, që të shënoheshin po kaq gola në 90 minuta.
Meksika dhe Uruguaji janë përballur në orët e para të kësaj të hëne, një takim i vlefshëm për grupin C të këtij aktiviteti.
Meksikanët kanë fituar 3-1 falë një paraqitje të shkëlqyer të Rafael Marquez-it. Grumbullimi i ish-lojtarit të Barcelonës, tashmë 37-vjeçar, qe kritikuar fort para fillimit të veprimtarisë, por ai rezultoi të qe thelbësor në marrjen e tre pikëve të para nga Meksika.
Në anën tjetër, Uruguaji e ndjeu fort mungesën e Luis Suarez-it, prania e të cilit mund të kishte sjellë një tjetër rezultat. Pa të në fushë, Uruguaji u duk një ekip më i thyeshëm. Megjithatë, duke patur parasysh nivelin e kundrështarëve të tjerë në grup, Venezuelës dhe Xhamajkës, nuk duket që do të jetë e vështirë për Uruguajin që të kualifikohet për në turin pasardhës.
Ndeshja e luajtur në Arizona do të merrte udhë me një autogol të uruguajanit Pereira. Një karton i kuq në minutën e 45-të për Vecino-n i shtoi vuajtjet e Uruguajit.
Godin u përgjigj me një gol në minutën e 74-t, duke i barazuar përkohësisht shifrat. Por minutat e fundit qenë fatale për uruguajanët. Marquez e riktheu Meksikën në avantazh pesë minuta para mbarimit të lojës. Kurse Herrera e thelloi rezultatin në minutën e 92-të. Meksika fitoi kështu 3-1. Nuk duhet harruar dhe një karton i kuq për meksikanin Guardado në nisje të çerekorëshit të fundit të lojës.
Në takimin tjetër të grupit, Venezuela fitoi më herët 1-0 ndaj Xhamajkës. /tesheshi.com/
