Izraeli mund të kishte patur të njëjtin fat si Shqipëria në miqësoret përpara përballjes së tyre të dielën në kualifikueset për Botërorin 2018.
Teksa përfaqësuesja e Shqipërisë humbi për turp me Luksemburgun ditë më parë, Izraeli shmangu në minutën e 95-të një humbje ndaj Moldavisë, në miqësoren e luajtur të martën.
Takimi mes Izraelit dhe Moldavisë përfundoi 1-1 falë një 11-metërshi të kthyer në gol në minutën e 95-të për vendasit nga Sahar, pasi miqtë kishin kaluar në epërsi pak minuta pas nisjes së pjesës së dytë.
“Ekipi kombëtar i Izraelit mori një thirrje për zgjim përpara kualifikueses kundër Shqipërisë, duke barazuar 1-1 pas një penalltie në minutat shtesë në Netanja me Moldavinë, një prej ekipeve më të dobëta të Europës,” shkruan The Jerusalem Post.
“Izraeli ishte në rrugën për t’iu bashkuar San Marinos dhe Andorrës si të vetmet ekipe që kanë humbur me Moldavinë në tre vitet e shkuara,” raporton e përditshmja izraelite.
“Qartësisht kjo paraqitje nuk do të qe e mjaftueshme ndaj Shqipërisë, por ne e dimë se mund të luajmë shumë më mirë,” deklaroi trajneri i Izraelit, Elisha Levy, pas ndeshjes.
“Kjo ishte një ndeshje stërvitore, dhe ne kishim nevojë për të pas një kohe të gjatë pa luajtur. Kishte gjëra pozitive, por kishte dhe shumë gjëra negative. Ama kjo ndeshje nuk ishte e rëndësishme. E rëndësishme është ndeshja kualifikuese kundër Shqipërisë.”
Izraeli pret kombëtaren shqiptare të dielën në Haifa, në betejën për vendin e tretë në grupin G të eliminatoreve europiane të Botërorit.
Izraelitët renditen të tretët, me tre pikë më shumë se kuqezinjtë, dhe e kanë fituar 0-3 takimin e parë në Elbasan nëntorin e 2016-s. /tesheshi.com/
