Al Jazeera njofton se një aleancë kryengritësish ka shpallur fillimin e betejës për të rimarrë të gjithë Halepin, e kjo vetëm një ditë pas çarjes së rrethimit në atë zonë të qytetit nën kontrollin e tyre.
Koalicioni i grupeve rebele bëri me dije të dielën se do ta dyfishonte numrin e luftëtarëve për këtë betejë të re.
“Ne shpallim nisjen e një faze të re për ta çliruar të gjithë Halepin. Nuk do të ndalemi gjersa ta ngrejmë flamurin e çlirimit mbi kështjellën e Halepit,” thotë një deklaratë e kryengritësve.
Rami Abdel Rahman, kreu i Observatorit Sirian për të Drejtat e Njeriut, e ka përshkruar çarjen e rrethimit nga kryengritësit si një prej humbjeve më domethënëse për qeverinë siriane që prej shpërthimit të konfliktit në vitin 2011.
Beteja për marrjen e të gjithë Halepit flet për luftime shumë më të ashpra në ditët e javët e ardhshme, ndërsa rebelët kanë marrë zemër nga suksesi i ditëve të shkuara.
Lufta për Halepin ka nisur që nga mesi i vitit 2012, duke qenë midis më të ashprave në tërë konfliktin sirian. Dikur krenaria e Sirisë, sot Halepi është kthyer i tëri në gërmadhë. /tesheshi.com/
