Vetëm pak ditë më parë me suksesin e Sarajevos në kampionatin boshnjak, Skënderbeu fitoi të drejtën për të qënë në vazon e parë të turit të dytë paraeliminator të Ligës së Kampionëve, por nëse kampionëve të Shqipërisë u buzëqeshi fati dhe në shortin që do të hidhet 22 Qershorin e ardhshëm, korçarët mund të kapin një kundërshtar më të lehtë nuk pritet të ndodhë e njëjta gjë me tre skuadrat që do të përfaqësojnë vendin tonë në Europa Ligë, Kukësin, Partizanin dhe Laçin.
Të tre këto klube kanë një koeficient të ulët në klasifikimin e UEFA-s dhe në shortin e turit të parë eliminator do të pozicionohen në vazon e dytë. Kështu mundësitë që Kukësi, Partizani dhe Laçi të kenë përballë kundërshtarë të një niveli të ulët janë pothuajse zero.
Por çfarë rrezikojnë konkretisht tre skuadrat shqiptare në shortin e turit të parë që do të hidhet në 22 Qershor në Nyon të Zvicrës? Rivalët në vazon e parë janë nga më të ndryshmit. Rreziku numër 1 është West Ham United, transmeton SuperSport.
Anglezët kanë fituar të drejtën për të marrë pjesë në Europa League si një prej tre skuadrave më fair-play dhe do të nisin gjithçka nga turi i parë. Përvec West Ham-it, kundërshtarë të tjerë të fortë që duhen evituar me çdo kusht nga Kukësi, Laçi dhe Partizani janë edhe Sherifi i Tiraspolit, Rosenborgu, Elfsborgu, Hajduku i Splitit, Apolloni i Limasolit, Omonia, Netchi Baku, Go Ahed Eagles apo edhe Brondby, Debreceni e Crvena Zvezda.
Në shortin e turit të parë do të marrin pjesë gjithsej 104 skuadra të cilat do të ndahen në 52çifte. Një short i favorshëm për tre ekipet shqiptare do të konsiderohej vetëm nëse Partizani,
Kukësi dhe Laçi peshkojnë skuadra të tilla si Valleta dhe Birkirkara të Maltës, Buducnosti i Malit të Zi, Rabotnicki i Maqedonisë, Havnar Boltfelag i Ishujve Faroe apo edhe Koper e Domzale të Sllovenisë.
Me pak fat Kukësi arriti të kalonte tre raunde para dy sezonesh në Europa League por që një ecuri e tillë të përsëritet duhet që fati të përndjekë sërish skuadrat shqiptare. /tesheshi.com/
