Ish-ministri i jashtëm gjerman, Guido Westerwelle i cili vdiq të premten në moshë 54-vjeçare ka qenë një përkrahës i madh i shtetit të Kosovës.
Ai ka vizituar disa herë Kosovën ku haptazi ka shprehur përkrahje e shtetit gjerman në rrugën e shtetndërtimit dhe intergimit euroatlantik.
Një nga vizitat që më së shumti mbahet mend është ajo e datës 27 gusht të vitit 2010 ku në atë kohë në pozitën e ministrit të Jashtëm të Gjermanisë Westerwelle kishte mbajtur një fjalim në Kuvendin e Kosovës.
Në seancën solemte të organizuar për nder të Westerwelles, deputetët kosovarë e pritën dhe përcjellë me duartrokitje frenetike ministrin e Jashtëm të Gjermanisë.
Duke iu drejtuar ligjvënësve kosovarë, Westerwelle theksoi atë kohë se është nder i madh që iu ka dhënë rasti të flasë para ligjvënësve kosovarë.
“Pavarësia e Kosovës dhe integriteti territorial i saj janë fakte të pakthyeshme. Gjermania do të lobojë që Kosova të marrë vendin e saj në familjen e popujve. E ardhmja e Kosovës është në Evropë”, deklaroi Westerwelle në seancën solemne para ligjvënësve kosovarë në vitin 2010.
Fjalimi i Westerwelle-s në Kuvendin e Kosovës më datë 27.08.2010
“Ju jeni përfaqësues të parlamentit që përfaqëson Kosovën demokratike dhe paqësore. E veçanta e shtetit demokratik është pikërisht parlamenti, sepse, përfaqësuesit e popullit kontrollojnë qeverinë dhe mbarë rrjedhat e një shteti. Në parlament janë shumica dhe pakica, pozita dhe opozita. Pikërisht këtu rrah zemra e shtetit demokratik, ndaj, ju keni përgjegjësi të lartë para qytetarëve”
Pavarësia e Kosovës është në përputhje me të drejtën ndërkombëtare dhe nuk e cenon atë. Gjermania e ka përkrahur pavarësinë e Kosovës, por, kjo përkrahje do të vazhdojë edhe në mbarë proceset tjera zhvillimore të Kosovës.
Skicimi i kufijve ka përfunduar, harta e Ballkanit Perëndimor ka përfunduar, ajo është vizatuar përfundimisht. Pavarësia e Kosovës dhe integriteti territorial i saj janë fakte të pakthyeshme.
Tragjeditë që kanë ndodhur nuk guxojnë të përsëriten. Ato nuk guxojnë të bllokojnë rrugën drejt të ardhmes. Ky vend, ka personalitete të larta, siç ishte Rugova, i cili ishte kundër dhunës dhe ravijëzoi rrugën drejt së ardhmes.
E drejta kushtetuese duhet të jetë edhe realitet kushtetues. Kosova e ka për detyrë të sigurojë jetë të përbashkët e të barabartë për të gjitha etnitë.
Kosova do të përmendet për ndërtimin e shoqërisë multietnike, duke përkujtuar se kjo betejë nuk është e lehtë, për shkak të trysnisë nga e kaluara. Në këtë aspekt, gjërat nuk mund të ecin shpejt, sepse identiteti duhet të zhvillohet në mënyrë të lirë, ndërsa kjo arrihet kur qytetarët kanë të drejta të njëjta.
Pajtimi kërkon kohë, por është i nevojshëm për një të ardhme të sigurt. Do të vijë një ditë që serbët dhe shqytarët do të jenë së bashku në BE.
Secila qeveri në Kosovë, do të matet nga ajo se si sillet ndaj objekteve të trashëgimisë. Tash, Kosova ka marrë përsipër ruajtjen e manastireve ortodokse dhe asnjë zgjidhje tjetër nuk do të ishte e më e mirë. Në BE dhe në NATO çështja e objekteve të kultit, posaçërisht e sigurisë së tyre, po diskutohet në detaje
Kosova ka perspektivë evropiane. Fakti që në Kosovë nuk ka konflikte, tregon se kontributi i KFOR-it në Kosovë u tregua i suksesshëm.
Gjermania, do të jetë gjithnjë përkrah Kosovës për tejkalimin e tyre.
Të gjithë ishin të vetëdijshëm se pa fqinjësi të mirë, nuk ka stabilitet, që është, njëherësh, edhe prioritet i BE-së.
Gjermania do të lobojë që Kosova të marrë vendin e saj në familjen e popujve.
E ardhmja e Kosovës është në Evropë.
Përgatiti: Blendi Gashi – /tesheshi.com/
