Nga Alba Skëndaj
Çfarë janë 18 vite për një grup të madh njerëzish, të cilët i bashkon një dramë e madhe, një vrimë e zezë që e kanë të ngulitur thellë në shpirtin e tyre dhe që kanë për ta mbajtur me vete deri sa të mbyllin sytë përjetë?
Nëse e keni harruar edhe ju të nderuar lexues, si shumë të tjerë këtë ditë, sot shënohen plotë 18 vite nga tragjedia e Otrantos. Kanë kaluar pa u kuptuar gjithë këto vite, por nëse të gjithë e kemi harruar, apo lënë disi në hije këtë ngjarje, në të cilën humbën jetën 108 persona që udhëtonin në anijen shqiptare Katri i Radës, e cila u godit nga një luftanije italiane, familjarët e viktimave e kanë ende prezent atë ditë të zezë të 28 marsit 1997 dhe nuk e kujtojnë vetëm në këtë datë ngjarjen e trishtë, por e mbartin me vete kudo që janë.
Mirëpo, si e ka parë bota këtë ngjarje kaq të rëndë të ndodhur në vendin tonë? Në ditët e sotme, ku interneti është bërë zotërues i gjithçkaje dhe një nga mjetet më të kollajta të marrjes së informacionit, duket se ka gjëra që u kanë shpëtuar analizuesve dhe drejtuesve të mediave, të paktën atyre online.
Në pamundësi për të disponuar materiale në print apo në mënyra të tjera të mediave më të rëndësishme botërore të 18 viteve më parë, por bëjmë një kërkim të shpejtë në rrjet, për të parë se si është pasqyruar kjo tragjedi shqiptare e si është parë me sytë e botës. Por me çfarë ndeshemi? Është e pabesueshme, por ka një pasqyrim tepër të vakët, për të mos thënë të ftohtë, të ngjarjes që rrënqethi mbarë Shqipërinë.
Të jetë vallë problem i mangësisë së internetit në atë kohë? Duhet të kujtojmë se në vitin e prapshtë 1997, interneti ende nuk ishte i zhvilluar në botë dhe mediat më të njohura në nivel botëror, ende nuk kishin faqet e tyre zyrtare në platformat online. Ndoshta është kjo arsyeja e këtij vakumi informacioni, megjithatë, çdo gjë kompensohet, pasi të gjithë ata që duan të mësojnë më shumë në lidhje me këtë tragjedi, eikipedia (enciklopedia e lirë) ofron informacion të përgjithshëm në një faqe të tërë kushtuar tragjedisë.
Informacioni disponohet në gjuhën angleze dhe në disa gjuhë të tjera si në atë spanjolle, gjermane e frënge.
“tesheshi.com” ka bërë një kërkim në faqet online të mediave fqinje, në shtetin italian, ku ndryshe nga shtypi në Francë, Britaninë e Madhe, Gjermani apo Amerikë, ku informacioni është i cunguar, në Itali, e cila preket edhe në mënyrë të drejtpërdrejtë nga kjo ngjarje, informacioni është i bollshëm, edhe pse nuk daton prej vitit 1997.
Në përvjetore të kësaj ngjarjeje, “La Stampa”, “Corriere della Sera”, “Tg com 24” e mjaft media të tjera, të cilat operojnë onilne, kanë pasur një atrikull të veçantë dedikuar tragjedisë së Otrantos.
Për më tepër, anija Kateri i Radës, u shndërrua në një “vepër arti” dhe mbahet në një muze në Itali, për të cilin prestigjozia “La Stampan” shkruan artikullin që mban titullin “Kateri i Radës shndërrohet në një vepër arti” dhe jepen detaje të shumta në lidhje me anijen dhe ngjarjen.
Tituj të tjerë në mediat italiane janë: “Otranto, përkujtohen viktimat e tragjedisë”, “16 vite pas tragjedisë së Otrantos”, “Tragjedia e Otrantos, reduktohet dënimi për shkaktarët” “Itali-Shqipëri, asnjë e vërtetë për tragjedinë në Kanalin e Otrantos” etj.
Ndërkohë që në ato ditë të zeza, të gjitha gazetat e edicionet informative hapeshim me lajmin e kobshëm që tronditi gjithë vendin, sot, 18 vite më vonë, vetëm pak nga mediat e sjellin në kujtesë ngjarjen e rëndë dhe i kushtojnë asaj ndonjë kronikë.
Koha shuan gjithçka, por vallë, a mundet koha të harrojë numrin e madh të viktimave të Otrantos, apo më shumë akoma, trupat e atyre personave që ngelën në fund të detit e s’u nxorën dot kurrë?
/tesheshi.com/
