Nuk është vetëm mërzitja e qarqeve serbe dhe “zija”që pllakosur rusët pas fitores së Emanuel Macron në Francë për të kuptuar se vota ndaj djaloshit “mes së majtës dhe së djathtës” është një shenjë pozitive për Francën.
Njëherësh, janë një sërë zhvillimesh që i japin votës së 8 majit një fuqi politike pozitive për aksin euroatlantik në Ballkan.
Presidenti amerikan, Donald Trump ka qenë i pari lider botëror që ka uruar Emanuel Macron normalisht me anë të një tëitter-it në adresën e tij zyrtare.
Nga të gjithë komentatorët botërorë, mesazhi i Trump është lexuar si një shprehje e vullnetit të qartë të SHBA për të punuar me një Europë më të fortë dhe qartësisht antagoniste ndaj Vladimir Putinit, për të ndalur agresionin e tij në Europën Lindore, Ballkan por dhe Lindjen e Mesme.
Mesazhi i Trump është aq i rëndësishëm pasi rrëzon të gjithë atë frymë të përhapur prej fitores së tij se politika amerikane do të ndryshojë e se do të ketë axhendë tjetër nga ajo që kishte nisur vite më parë në gjeopolitikën botërore.
Dhe kjo është shumë e rëndësishme për shqiptarët, pasi përfshihen ndër të kërcënuarit e parë nga Kremlini, në planin e brendshëm e atë rajonal, me deklarata zyrtare por edhe me mizanskena për destabilizim.
Ministria e Jashtme ruse ka sulmuar hapur qeverinë shqiptare disa herë se gjoja po mbështet “Shqipërinë e Madhe”, duke iu referuar Platformës Shqiptare në Maqedoni.
Të njëjtën gjë e ka bërë edhe Nikos Kotzias, ministri i Jashtëm grek, i cili njihet si mik i ngushtë i Aleksandër Duginit, këshilltarit apo “rasputinit” të Vladimir Putinit që kërkon instalimin e situatës së kohës së Traktatit të Shën-Stefanit në Ballkan.
Me fitoren e Macron-it, siç e thekson në mënyrë të qartë edhe Sputnik-u rus, në Ballkan do të vijojë strategjia e nisur nga kancelarja Angela Merkel për të integruar rajonin në Bashkimin Europian.
Zonja Merkel ka tashmë një aleat të sigurtë dhe të fuqishëm në lojë. Kjo sepse Macron fitoi zgjedhjet duke pasur si linjë të qartë dhe të fortë Europën dhe një BE të fortë.
Tashmë kjo linjë ka mbështetjen e dy vendeve bazike dhe më të mëdha të Bashkimit Europian, Gjermaninë dhe Francën.
Pritet që kjo frymë të përhapet kudo në kontinent, teksa dhe Holanda e dha para pak kohësh, edhe pse jo në marzhe kaq të mëdha.
Po le të vijmë te Shqipëria.
Bashkimi Europian mbështet kursin e ndjekur nga qeveria shqiptare për të pastruar drejtësinë nga korrupsioni duke instaluar një gjyqësor të ri që do të nisë dhe pastrimin e politikës.
Ky operacion u bllokua me stopimin e vettingut dhe solli bojkotin e PD-së nga zgjedhjet e 18 qershorit. Por BE dhe SHBA e kanë bërë shumë të qartë që zgjedhjet do të njihen edhe pa PD-në. E ka deklaruar literalisht ambasadori amerikan, Donald Lu dhe ambasadorja gjermane, Susane Shultz.
Tani pritet të flasë edhe ambasadori francez, vendi i të cilit ishte në zgjedhje dhe natyrisht nuk ka dashur të komplikojë situatën.
Sakaq, Franca e Makron-it, i cili ka qenë pjesë e rëndësishme e kabinetit të Françoise Holland e(si Sekretar i Përgjithshëm i Presidencës dhe ministër i Ekonomisë), para pak kohësh i akordoi kryeministrit shqiptar Edi Rama medaljen më të rëndësishme të vendit të tij, atë të Komandantit të Legjionit të Nderit.
Dhe kjo irritoi jo pak qarqe politike në vend dhe rajon, duke e krahasuar edhe si çmim për ekstradimin në Serbi të Ramush Haradinajt.
Por Ramushi u lirua në mënyrë të pastër, natyrisht nga Ggjykata, por me një memo të Ministrisë së Drejtësisë Franceze që refuzonte dërgimin në Serbi dhe kjo u bë në mes të fushatës zgjedhore, ndonëse pas raundit të parë, në mënyrë që të mos keqpërdorej për fushatë.
Në një farë mënyrë edhe Haradinaj ishte pjesë apo peng i një lufte të qarqeve ekstremiste të Marine le Pen, e cila pasi mori para me shumicë nga bankat ruse, ngriti në qiell Vladimir Putinin, serbët dhe premtoi se do t’ja kthente Kosovën Beogradit.
Njerëz pranë opozitës, prej atyre që japin qëndrimin në rrjetet zyrtare bënë të ditur se Europa është në krizë dhe po shkon drejt degradimit, ndaj dhe po avancojnë formacione të reja antiestablishment si Le Pen etj.
Por po ta analizosh më thellë, ajo që u ngrit në Francë dhe po bëhej modë kudo kishte dhe në Shqipëri gjurmët e saj.
Ajo që Emanuel Macron deklaronte një vit më parë se është “as i majtë e as i djathtë”, Edi Rama e shpallte që në 2009-n “përtej së majtës dhe së djathtës”, një rrugë që shumëkush e shikonte si injorancë politike dhe një mungesë identiteti. Por që sot është më në modë se kurrë.
Ndërkaq, Lulzim Basha, kur shpalli MAGA-n shqiptare në gazetën RD dhe “Republikën e Re” në çadër pas 18 shkurtit, nisi një zhargon të ri poltik me fjalët “prapanicë” e “bullshit” si për të imituar kolegët e Le Pen-it e Beppe Grillo-s.
Dhe në një Shqipëri që shkon në zgjedhje me një handikap të madh siç është bojkoti i PD-së, mesazhi që vjen nga Franca shpresohet që të ndikojë në rikthimin e arsyes dhe braktisjes së përlasjeve politike. Mbrëmë, sytë dhe veshët nga Frabnca i ka patur dhe një pjesë jo e vogël e saj, e që do të thotë se dhe ka patur gjithashtu të gëzuar e të dëshpëruar, me fitoren e Macron-it e humbjen e Le Pen-it. /tesheshi.com/
