Ç’u bë me negociatat Tiranë – Athinë për Marrëveshjen e re Detare, Ligjin e Luftës e të tjera çështje? Pse Tcipras nuk erdhi në korrik në Tiranë siç u përfol?
Këtyrë iu është përgjigjur ministri i Jashtëm grek, Kotzias, i cili të gjithë fajin ia ka përcjellë palës shqiptare
Ministri i jashtëm grek, Nikos Kotzias, ka deklaruar se negociatat Athinë – Tiranë janë bllokuar për shkak të rezervave të presidentit shqiptare dhe mungesës së kuorumit të gjykatës Kushtetuese të Shqipërisë.
Kotzias i bëri këto deklarata pas takimit me homologun gjerman, Heiko Maas, të cilin siç tha, e informoi për marrëveshjen e Prespës (për emrin e Maqedonisë) dhe ecurinë e negociatave me Shqipërinë.
“Ne i bëmë negociatat me Shqipërinë. Dhe siç e dini, tani janë bllokuar jo nga ne, as nga ministria e Jashtme atje, por në problemet administrative që kanë, në mospajtimin e presidentit të vendit fqinj me qeverinë. Dhe në faktin se Gjykata Kushtetuese në këto momente nuk ka kuorumin e plotë për të funksionuar plotësisht”, tha Kotzias, gjatë një konference shtypi me homologun gjerman, Hieko Mass, i cili një ditë më parë vizitoi Tiranë.
Nga ana tjetër, kreu i diplomacisë së Athinës preku dhe dy çështje të tjera të mprehta rajonale; marrëveshjen me Shkupin për emrin e ri të Maqedonisë, si dhe kufijtë mes Kosovës dhe Serbisë.
Për të parën tha: “ne e mbështetëm dhe e mbështesim marrëveshjen e Prespës. Konsiderojmë – dhe nuk do të lodhem kurrë ta përsëris, se historia duhet të jetë shkollë dhe jo burg. Marrëveshja na nxorri nga burgu. Disa ëndërrojnë që të futen sërish në burg. Ne nuk do t’i ndjekim”.
Ndërkohë, nuk shprehu dakorësi për ndryshim kufijsh.
“Ne nuk duam të kemi ndryshim kufijsh në rajon. Nuk duam të kemi akte që mund të shpien në domino negative. Nga ana tjetër, urojmë që të dy shtet t’i zgjidhin problemet e tyre. Dhe sigurisht, u përket vetë atyre të gjejnë mënyrën se si do t’i zgjidhin”, theksoi shefi i diplomacisë greke. /tesheshi.com/
