Startapi i ri i Tiger Woods dhe Rory McIlroy, i cili planifikon të krijojë një kampionat të ri golfi, tashmë ka tërhequr shumë emra “të artë” nga bota e investimeve dhe sportit.
TMRW Sports njoftoi partneritetin e saj me një grup investimi që përfshin basketbollistin e NBA Steph Curry, pilotin e Formula 1 Lewis Hamilton, futbollistët e famshëm Gareth Bale dhe Alex Morgan, lojtarët e futbollit amerikan Tony Romo dhe Josh Allen, këngëtarin Justin Timberlake dhe legjendën e tenisit Serena Williams.
“Ne donim të bashkonim një grup investitorësh që kanë të njëjtat qëllime si ne, të cilët besojnë se teknologjia mund të përmirësojë botën e sportit, por edhe të ndihmojë në aspektin e aksesit në sport për shoqërinë e gjerë”, theksoi Mike McCarley, CEO dhe bashkëthemelues i TMRW Sports, sipas CNBC.
Përveç këtyre emrave të njohur, kompania ka investuar në pronarin e ekipit amerikan të futbollit Atlanta Falcons, Arthur Blank, bashkëpronarin e ekipit NBA Philadelphia 76ers, David Blitzer, pronarin e ekipit të Minnesota Vikings, Mark Wilf dhe bashkëpronarët e ekipit të bejsbollit Boston Red Sox, John Henry dhe Tom Warner.
Projekti i parë i madh i TMRW Sports është krijimi i turneut të golfit TGL, për të cilin është në partneritet me organizatën PGA Tour. Kjo lëvizje konsiderohet e logjikshme, në një kohë kur turneu i golfit LIV Golf, i mbështetur nga një “pako” investimesh saudite, ka hyrë fuqishëm në treg.
McCarley theksoi se kompania është në kërkim të investitorëve që kanë pasion golfin dhe vijnë nga sektori i medias dhe i argëtimit. Sipas kompanisë, investitorët e saj kanë marrë gjithsej 40 çmime Emmy, 10 çmime Grammy, 21 medalje ari olimpike dhe shumë tituj të tjerë kampionate.
“Kaq shumë sportistë, artistë dhe njerëz nga të gjitha sferat e jetës ndajnë pasionin tonë për sportin dhe duan të ndihmojnë në ndërtimin e një të ardhmeje të re për sektorin e sportit,” tha Tiger Woods gushtin e kaluar.
Më në fund, McCarley theksoi se ai po punon si me Woods ashtu edhe me McIlroy për të inkorporuar risitë e reja teknologjike në turneun e ri të golfit, siç është krijimi i një kursi të brendshëm që nuk do të ndikohet nga kushtet e këqija të motit. /tesheshi.com/
