Nga Mensur Krasniqi
Pas 18 orëve bisedime, grupet punuese e nënshkruese “Përzhino”-s në Maqedoni, arritën marrëveshje për rregulloren zgjedhore. Është përcaktuar mënyra e zgjedhjes në KSHZ, votimi i diasporës dhe pastrimi i listës zgjedhore. Anëtarët e KSHZ-së do të zgjidhen me formulën tre plus tre, që nënkupton kah tri përfaqësues nga pushteti dhe opozita, si dhe tre ekspertë që do të zgjidhen në Parlament. Vendimet do të sillen me shumicë absolute. Diaspora do të votojë në një njësi zgjedhore, me modelin proporcional, prej ku do të dalin tre deputetë. Lista zgjedhore do të pastrohet në mënyrë të kombinuar, gjegjësisht në terren, dhe duke marrë të dhënat nga institucionet. Pritet që ligji të futet në procedurë parlamentare dhe të votohet.
E gjithë kjo, për analistin politik Xhelal Neziri paraqet një kompromis midis asaj që kërkonte opozita dhe asaj që këmbëngulte pushteti. Mirëpo sipas tij edhe përkundër kompromisit të mazhorancës me opozitën, sërish kjo marrëveshje ka hapësira për t`u korigjuar.
“Te përbërja e KSHZ duket se shumicën do ta bëjnë tre ekspertët jopartiak që do të zgjedhen nga Parlamenti. Partitë do të tentojnë të infiltrojnë njerëz të afërt si ekspertë, gjë që mund ta komplikoje votimin e tyre dhe kompletimin e KSHZ. Pastrimi i listës zgjedhore sërish do të jetë i mangët për shkak të mungesës së regjistrimit, por me këtë model do të kemi një listë me reale në krahasim me atë të zgjedhjeve të kaluara”, tha për tesheshi.com, analisti politik Xhelal Neziri.
Gabim në këtë marrëveshje thotë Neziri, është zgjedhja e 3 deputetëve nga diaspora, të cilët janë projektuar në atë mënyrë që t’i fitojë VMRO-DPMNE-ja. “Diasporës duhet t’i mundësohet votimi, por për listat e gjashtë njësive zgjedhore në Maqedoni”, shtoi më tutje Neziri.
Edhe analisti tjetër politik, Sefer Tahiri vlerëson se marrëveshja e arritur është kompromis midis partive negociatore, pasi qëndrimet politike mes pushtetit dhe opozitës ishte e natyrshme që do të jenë të kundërta.
“Mendoj se ky kompromis i dëmton shqiptarët në dimensionin politik, sepse votimi i diasporës, edhe pse me prag shumë më të lartë zgjedhor, u pamundëson vendimmarrje, pasi diaspora maqedonase me mbështetjen e pushtetit dhe strukturave tjera do të bëjë çmos që të zgjedhën deputetë të diasporës që janë të përkatësisë etnike maqedonas”, deklaroi për tesheshi.com Sefer Tahiri.
Sa i përket listës zgjedhore, Tahiri thotë se ajo është e drejtë dhe si e tillë duhej të trajtohej, edhe pse zgjidhja e kombinuar është më e kapshme se sa detyrimi dhe kontrolli i listës zgjedhore shtëpi për shtëpi.
Ndërsa ajo që është më e pëlqyeshme nga kjo marrëveshje për rregullativën zgjedhore vlerësohet të jetë sipas Tahirit, zgjedhja e anëtarëve të KSHZ-së, pasi i suguron edhe shoqërisë civile qasje në procesin zgjedhor dhe me vendimmarrje konkrete edhe të evitojë parregullësitë e mundshme gjatë votimit në KSHZ. /tesheshi.com/
