Dr. Anthony Fauci, eksperti kryesor i administratës amerikane për sëmundjet infektive, tha të premten se Amerika nuk do mund të kthehet nga makthi i koronavirusit në jetën normale deri në vitin 2021, pasi do të duhen muaj për të vaksinuar shumicën e popullsisë.
Fauci, një imunolog 79-vjeçar, tha se ai ende pret që vaksina të jetë në dispozicion në fillim të vitit 2021.
“Nëse flisni për normalitetin para COVID, do të jetë mirë në 2021, mbase edhe drejt fundit të 2021,” i tha ai televizionit MSNBC.
“Për sa kohë që ju mobilizoni shpërndarjen e vaksinave dhe vaksinoni dhe mbroni shumicën e popullsisë, kjo mund të zgjasë deri në fund të vitit 2021.”
Ai gjithashtu shprehu shqetësimin për hapjen e pjesëve të mbyllura të restoranteve në mot të ftohtë.
“Të qenit në ambiente të mbyllura rrit absolutisht rrezikun,” tha Fauci.
“Më shqetëson kur shoh aktivitetet në ambiente të brendshme dhe bëhet gjithnjë e më e pashmangshme ndërsa hyn vjeshta dhe dimri”.
Restorante, palestra, kinema, teatro, floktore dhe sallone bukurie ngadalë po hapen në të gjithë Shtetet e Bashkuara.
Fauci paralajmëron se njerëzit duhet të jenë veçanërisht të kujdesshëm gjatë muajve të vjeshtës dhe dimrit në mënyrë që të mbrohen nga virusi.
“Ne po arrijmë një nivel prej rreth 40,000 rastesh infeksioni në ditë dhe rreth 1000 vdekje,” tha Fauci. /tesheshi.com/
